وينساح معك الفكر فالممكن وفا للي مستحيل
كأنه موجات يرقصن على وجه النهر
خذني على كتفك خوي خذني على كتفك دليل
ويا حبذا لـو كان مسرانا على ضوء القمر
البارحة يا ليل جاني ليل مهو كل ليل
سجيت فـاحلام السعادة واعتقـد عندك خبر
علمك اخوك الليل الأول عن حكايات ألف ميل
وإن كان ما تدري فبهمس لك بسر مختصر
جتني وأنا فـأحلا منامي كنها عابر سبيل
وتوسدت صحراء ضلوعي وانهمر معها المطر
لين إن وديان الضماير كل وادي جاب سيل
وغنت عصافير المحبه فوق الأغصان الخضر
قامت تحدثني حديث العشق في جو جميل
وتغوص فاعماق السنين وتجذب أنواع الخبر
حديثها ينساب فاسماعي سواة السلسبيل
ويصب في واحة خفوقي بين ريضان وزهر
وذاب الحديث الي سمعته ما بقى غير القليل
اذكر منه يا ليل ومضات مثل لمح البصر
آخر عباره يوم قالتها وعبرتها تسيل
وداعــة الله نلتقي قــدام والدنـــيا ممر
وشكرتها يا ليل عما قالته شكراً جزيل
اخذ الكلام الموجز اللي مثل رشات المطر