[نظرة حياء]

السلام عليكم ورحمة الله وبركاته
اسمحولي اخرج من اطار الفصحى للعامي شوي
مع اني اعشق الكتابه فيها
لكن للتغيير ..

كلنا نعيش ولكل واحد منا طريق يسلكو وكمان طريقه يعيش فيها ..
احنا نتفق في شي واحد العقيده والمفروض ما نختلف فيها ابداااا ..
و رغم كذا فيه للدين مذاهب وكل مذهب فيه اختلاف عن الثاني ..
لكن الاسلام هو الاسلام مهما اختلف الزمان او المكان ..

حنطلع شوي من اساس الحياة لفروعها ..
كل واحد فينا عندو اهداف وعندو طموحات وكمان قدرات ..
اللي اقدر اسويه غير ممكن يعجز عنو والعكس صحيح ..

تخيلو معي انو جالسين نمشي في طريق واضح وباينه كل معالمو وتضاريسو من جبال وانهار واشجار وغيرو ..
وفجأه ومن غير مقدمات قابلتنا في نفس المكان طرق متشعبه ..
وطبعا كل طريق متاهة لوحدو ..
اكيد حنحتار اي واحد فيهم نحدد انا ندخلو وايش اللي يستنانا جواه ..
وياترى هو الطريق اللي احنا محتاجينو ..
المشكله والغلطه اللي غلطناها انو ما فيه معنا اي مرشد او دليل عشان يدلنا ويخبرنا ايش اللي قدامنا ..

طيب والحل ؟؟
ولنفترض انو غامرنا و قررنا انو نختار واحد من الطرق واحنا ماندري كيف حتكون النهايه ..
وبعد مده واحنا نمشي وبدون اي معرفة بالجو المحيط فينا يجي ناس طيبه تساعدنا وترحب فينا ..
تحسسنا بالامان بعد ما كان الخوف مسيطر علينا ..
ياترى ايش حنقدم لهم ؟؟

عن نفسي :
اقل شي كلمة شكر اخص كل واحد باسمو ..
وانا من هنا وبمناسبة استلامي لشهادة ميلادي من جديد وانظمامي لاسرة اشراق العالم ..
اتوجه بالشكر الجزيل للجميع عامة ..
وللبعض خاصة ..

الفــارس
شكرا لك اخي الكريم على تعاونك معي وتفهمك خوفي من المنتديات واللي بسببو ما سجلت بأسمي نظرة حياء
لساني عاجز عن الشكر لن اوفيك حقك على اللي سويتو معي
فجزاك الله عني خيرا
ورزقك التوفيق والسداد اينما تكون انه ولي ذلك والقادر عليه ..

مغادر
اخي الكريم
رغم ان ردودك على مواضيعي مو كثيرالا انك انت سبب تواجدي الحقيقي و حماسي للاستمرار في اشراق العالم ..
جمله رديت بها علي كانت هي الدافع ..
كتبت رد لي هذا نصه ..(( وبإذن الله سأكون عونا لك وسأعطيك رأيي بصراحة في كل ماتكتبين
بدون مجاملة ))
يمكن ردك ما تجاوز سطر واحد لكن خلاني اتحمس جدا..
فشكرا جزيلا محملا بأكاليل العرفان ومعطرا بشذا الاحترام والتقدير لشخصك الكريم ..
جزاك الله خيرا وبارك بك

ضجيج الصمت
اسم اصبح له من التأثير علي الكثير ..
بصمة وضعتها ضجيج الصمت تخصها وحدها لها رونقها وروعة لا تليق الا بها
شكرا لك يا قلبي من اعماق قلبي

في لحظات مرت حسيت انو شمسي كادت ان تغيب ..
والسبب بسيط انو الناس اللي كانو يساعدوني ويقوموني غابو عن المكان اللي انا فيه
ولانو عالم الانترنت في حال حكمت على قلمك بالمغيب معناتو ببساطه حكمت عليه بالموت ..
ايوه هذه هي نظرتي لهذا الوضع احنا ما كنا عرفنا بعض او كيف نفكر لولا اقلامنا اللي تجسد شخصياتنا ..
فقدت الكثير من الاخوه والاخوات من هذا العالم فأسأل الله لهم التوفيق والسداد في حياتهم وانهم يكونو في احسن حال ..

وكمان ما انسى اصحاب اقلام يستحقو اذكر اسمائهم من اشراق العالم ..
الاخ الصيرفي شكرا لك
عسوووله العسووله كمان شكرا
ملكة الليل الف الف الف شكر من كل قلبي لكل حرف نورتيني فيه
امواج الف شكر
وغيركم من الناس اللي شرفو صفحاتي ..

احبتي في الله ..
نصيحة اوجهها للكل من تجربه وممارسه ...
كونو عونا لاي احد جديد الصوره الاولى لكم في عينو هي الاساس اللي حيتعامل معكم فيها ..
حصل معي موقف من زمان سوء فهم من شخص هو رائع في الحقيقه لكن لانو اول موقف كان مشاده بينا
جلست فتره اشعر بالرهبه من الوجود معه في نفس المكان وحتى كنت اخاف ارد على اي موضوع يحطو او يشارك فيه ..
عشان كذا انا هنا اشكركم من كل قلبي على جميل تعاملكم معي وكرم اخلاقكم ..
فلولا توفيق الله ثم هذا الادب والتعاون ما تجراءت اكون هنا بينكم ..
وكنت اكتفيت بالمنتدى اللي انا فيه من زمان
واجهت من المواقف اللي خلاني اخاف واتردد كثير اني اخرج واطل براسي برى البيت اللي ضمني هو ومن فيه وكانو لي الاسره بكل افرادها ..
ايوه هناك عندي اب وام واخوان واخوات لكل منهم مكانته و لكن الكل تقريبا رحل ..
البعض اعرف ليه والبعض الاخر اجهل اسبابهم ..
اعتذر عن الاطاله لكن هذا طبعي فالتمسو لي العذر
بارك الله فيكم واسعدكم