[نقـاء]

««البارت الحادي عشر »»
.
.
وعند صالح اللي كان جالس وهو يدق رجله بالارض بغضب شاف سلوى اللي طلعت من بيتهم وجت صوبه: صالح وش فيك هنا
صالح : بنجن بنهبل بموت
سلوى: بسم لله وش فيك
صالح اللي تلفت وماكان فيه احد فالحاره بعد ذا الساعه : ابوي بيزوج الترف
سلوى شهقت: هااااه وش تقول
صالح: ارخي صوتس فضحتينا
سلوى: بيزوجها من
صالح: ثنيان الضابط
سلوى بفرح: بالله وانت ليش معصب
انتبه صالح لصوتها الفرحان: سلوووه ترا ما نسيتكم وانتم توايقون على الرجال لا طفريني عشان ما اكفختس
سلوى: وش سويت انا اسالك
صالح : الرجال متزوج وعنده عيال ومب بس متزوج عنده 3 حرييم 3
سلوى ضربت صدرها بصدمه: افااا ذاك المزيون تزوج
وقف صالح بغضب : انتي ما تستحين على وجهتس
تورطت سلوى: امزح عليك يا رجال امزح بس بغير جوك
صالح: ابوي موافق واخاف يعطي الترف
سلوى: بس حرام الترف تزوج كذا
صالح: هذا اللي انا ابيه ابيتس تروحين لترف وتعلمينها وتشرحين لها كل شي وتفهمينها زين لا تطيع ابوي وقولي لها ذا الرجال ما يناسبها
سلوى: لو تقول لها انت ازين انت اخوها وتحبك اكيد تسمعك
صالح: انا ان رحت مت من القهر انتي صديقتها قوليها السالفه من بنت لبنت بتفهم عليتس وتفهمين عليها
سلوى: خلاص ابشر اقولها
صالح: تكفين يا سلوى اهم شي لا تقتنع به ابد
سلوى: ابشر يا صالح
صالح : خلاص روحي لبيتس الوقت تاخر والدنيا برد
سلوى ضحكت : وانت بعد ادخل لا تمرض
صالح : من عيوني يا سلوى
دخلت سلوى وهي مبتسمه وبنفس الوقت مصدومه ان ثنيان متزوج 3 حريم ويبي الترف الرابعه
................••............
ومن بكره في بيت ابو ثنيان
نزلت رهام مستعجله قبل يصحى احد وهي تاخذ الورقه من تحت الشتلات وشافتها مثل ماهي ورجعة وهي خايفه وقف بالمطبخ وفزت على صوت شوق: وش عندك من صبح الله تراكضين
رهام: ولا شي اشتغل
شوق: فيه فطور ولا
رهام : باقي
نوف: فيه فطور
رهام: ما سوينا شي باقي
جات دلال : بدل ما تتكلمون سووا فطوركم انتم بأنفسكم
شوق : يمه تكفين سويه انتي مالي حيل
دلال : يلا ساعدوني بس نوف روحي شوفي ابوي وامي صحوا ولا لا
نوف راحت وقبل تدخل سمعت صوت ابو ثنيان وهو يقول لام ثنيان: يابنت الحلال انا وش اسوي في ولدك مجنون خالص عجزت فيه غصب يبي يتزوج الرابعه
ام ثنيان: ما علي خله يتزوج الرابعه بس ما لقى يتزوج الا سمرا
ابو ثنيان: وش دراني عنه انا اخذني وورطني معه
ام ثنيان : يا رب ما يوافقون عليه يارب
نوف اللي سمعت الخبر وطارت عيونها ورجعت وهي تدق الباب : جدي جدتي صحيتوا
ابو ثنيان: اييه ليه وش فيه
نوف : امي تسال
ام ثنيان: هالحين بنجي
راحت نوف وهي بتشقق من الفرح ان ثنيان تزوج على مي دخلت وهي مبتسمه وتلفت شافت امها مب فيه وركضت لرهام وشوق : عندي لكن قنبلللله بتفجر مي تفجير
رهام: يا الله منك يا نوف وذا الحقد من صبح الله
شوق : بسرعه قبل تجي امي
نوف : خالي ثنيان بيتزوج الرابعه
شهقوا كلهم بصدمه: في ذمتك
نوف: اصبروا اصبروا لا واللي ييتزوجها سمراء من الخوال
شوق : اماااااا عاد
رهام: يووه مي بتموت بتموت
نوف : مب مي لحالها جدتي بيجيها جلطه
رهام: من وين دريتي
نوف : سمعت جدي يقول لجدتي.
دخلت ثريا : سلام
الكل: وعليكم السلام
افترقوا كلهم وثريا تحط فطور بلحال
رهام: لمين ذا الفطور بيجهز الحين
ثريا: محمد معدته اتعبته ولا يبي فطور دسم
بلعت رهام ريقها ورجعت ورا بهدوء
................••............
اما محمد اللي من كثر ما فكر وتوتر صحى الصبح على وجع بمعدته فضييييع كان جالس بعد ما تصارع مع ابوه على الدواء
ابو ثنيان: يا محمد خل نواف يوديك المستشفى
نواف : ايه بالله عليك قم كذا ما ينفع
محمد :لا لا شوي وبصير احسن
بندر : خالي ترا بعدين بتدوخ
سيف : طيعني وتعال معي
محمد : يا ناس متعود عليها انا عادي
ابو ثنيان: كله من العله اللي تشربه
لف محمد بضيق وهو مايبي يسمع اي صوت وقف : انا بروح امشي
طلع محمد والكل جالس
نواف : يبه كيف عشاكم امس
ابو ثنيان: زيين زين
سيف: طولتوا صح
ابو ثنيان: القريه بعيد شوي
................••............
في بيت ثنيان
وعند ثنيان اللي صحى ونزل وهو يشوف منيره مجهزه الفطور
ثنيان: يعطيها العافيه
منيره: يعافيك
ثنيان: وين محمد
منيره: نايم
ثنيان: قوميه يفطر
منيره: افطر بدري مره ونام
ثنيان: زين اجل
منيره بتوتر : وش صار معكم امس
ثنيان استصعب يقولها : سوينا اللي علينا
فهمت منيره انه مايبي يحكي ويضايقها: الله يكتب اللي فيه الخير
افطر ثنيان وطلع متجهه لعجاج بيبلغه بفرح
................••............
عند عجاج اللي كان يجهز لدوامه صحى الصبح وطلع لسيارته ولف بفجعه لما سمع شباك السياره يدق بسرعه : ثنيان وجع فجعتني
ثنيان: صباحو المداومين
عجاج : صباح ورد
ثنيان: صباحي احلى خال والله
عجاج : وينك غاط امس
ثنيان وهو على الباب : خطبت
لف عجاج له: خيييير وش قلت
ثنيان : وش فيك
عجاج : من جدك
ثنيان: ايه وقالوا بيفكرون ويردون
عجاج : قسم بالله انك اهبل واغبى انسان شفته
ثنيان: عجاج وش فيك انت
عجاج : انت مريض خلاص حطيت شي براسك وبتسويه
ثنيان: المفروض تفرح وانت تصارخ
عجاج : لا مابي افرح شوف شهر شهر بالكثير اذا تزوجت ذا البنت شهر وبترجعها مطلقه لا بترتاح انت ولا بتترك ظليمتها
ثنيان: الحين وش له داعي ذا الكلام
عجاج : لاني انصحك وانت مووولي روح يا ثنيان وسوو لللي تبي ولا تجي تقول انصحني وتضرب بنصيحتي الجدار اخوي واحبك وعزيز علي بس اللي انت قاعد تسويه غلط
ثنيان: كيف افهم ذا الحكي
عجاج اللي بلحظة زعل قال : بتتزوج ذا البنت لا تذكرني ابد
ثنيان: اييش انهبلت انت
عجاج : لا ما انهبلت انا جالس اصحيك على اغلاطك تعلم تواجهه مشاكلك مو كل مره تتهاوش مع وحده من حريمك تاخذ نفسك وتروح تخطب
ثنيان:زين يا عجاج دام هذا اخر حكي زين
تركه ثنيان وراح وعجاج المقهور من كل الطرفين وهو يدري ان ثنيان بيمل بكره ويقول بتزوج ولا بيطلق ودام الترف هاذي مشاكلها مستحيل تصفى مع ثنيان ومن جهه ثانيه مقهور على الترف وهو يدري ان ابو ثنيان ما تقبل عجاج ابد هذا وهو صاحب كيف بيتقبل الترف ويدري كمية العنصريه والتنمر اللي بيجيها
سكر باب سيارته بغضب وتحرك لدوامه وهو ضايق مره
وثنيان اللي انصدم من ردة فعل عجاج بس زعل حيل من كلامه وراح هو الثاني لدوامه
..................••............
وبعد ايام بالضبط
في بيت ابو الترف
وعند الترف اللي بدت تشتغل وسمعت ابوها ينادي لها وراحت : هلا يبه
ابو الترف : تعالي اجلسي
الترف جلست وقلبها فز بخوف : امر
ابو الترف : يا بنيتي انتي كبرتي وصرتي ماشاء الله عليتس عروس وخطابتس كثروا و جاني رجال كفو ووظيفته طيبه ورجال ينشد فيه الظهر وماشاء الله عليه وخطبتتس مني وانا سألت عنه وكل واحد اساله يمدحه هذا غير انه محافظ على صلاته ولا يدخن وانا افكر اني اعطيه لكن بسألتس قبل موافقه
الترف : والله يبه مدري اللي تشوفه انت انا معك
ابو الترف : بس يا بنيتي الرجال متزوج 3 وعنده عيال
شهقت الترف بصدمه : يبه وش اللي متزوج لا والله ما اخذ انسان متزوج ابد ابد
ابو الترف : احترمي ابوتس وانتي تكلمين معه
الترف : يا يبه الله يهداك هذا مايبي له تفكير وشلون تفكر تعطيني شايب
ابو الترف: من قالتس انه شايب اكبر من صالح بسنيتن ثلاث وبعدين تراه هو الضابط اللي ساجن منير ولا اخذ سلاح صاالح
الترف اللي كانت بتموت من الصدمه وهي تناظر ابوها الجدي : لا يبه انت مستحيل ترميني ذا الرميه
ابو الترف اللي صرخ بصوت عالي : وش اللي ارميتس مهبوله انتي انا ادور مصلحتس ولا تبين ازوجتس من عيال الجماعه واجلسي طايحه هنا
الترف : اتزوج لو كلب بس متزوج هذا
ابو الترف اللي وقف وسحبها وهو يقول بكلام قطعي : انا علمتس وجيتس بالطيب لكن ما تسمعين لكن حطي في بالتس الرجال بتاخذينه وان قلتي لصالح شي اذبحتس واذبحه معتس سمعتي
تركها وراح وانهارت الترف تبكي ركضت وهي تاخذ عبايتها وطارت لبيت سلوى
.................••............
وعند ثنيان اللي كان له ايام وهو اعصابه مشدوده و24 ساعه معصب ولا يبي احد يكلمه وكان سبب هذا عجاج اللي مصر انه ما يحاكيه ابد لين يشيل الفكره من باله ولكن تنتهي ذا العصبيه عند منيره كان في غرفته ودخلت مشاعل وهي تقول : نثيان الغداء جهز
ثنيان طلع وهو ساكت وجلس بهدوء الكل جلس وصار عمر يتشرط ومايبي ياكل ويسحب الكرسي لين انفجر ثنيان وهو يقول : انننننكتم انت كم مره اقول مااااابي ازعاج
بلحظة انقطع صوت عمر وتبدل وجهه لخوف وجلس وهو شوي ويبكي
سكتوا كلهم ووقف ثنيان بغضب وطلع وترك الغداء
مشاعل: يوووه وش فيه ثنيان معصب كذا
منيره : مدري متهاوش مع عجاج اتوقع
مشاعل: قولي غيرها ثنيان وعجاج يتهاوشون ؟؟؟
منيره: انا اقول يمكن
مشاعل : الله يهديه بس
................••............
في بيت ابو ثنيان
وعند محمد اللي ابوه رافض كلياً يرجع البيت ومحمد اللي مل من كثر ما يفكر ويتوتر وقلبه يوجعه كل مره يصادف فيها رهام اللي صارت ذا الفتره يوضح ارتباكها حتى قدام محمد
كان جالس وهو سرحان وفز لما صرخ عليه نواف: يا شيييينك ياخي
نواف :وش فيها العالم متكهربه محد يبيني امزح معه
محمدد : ليييه من بعد غثيته
نواف: مر ثنيان اول من عند الباب وهو معصب بغيت امزح عليه وقالي وهو على بعد 10 متر " كل تبن وابلع لسانك "
ودلال بغت تهفني بالصينيه ورهام بعد قالت ابلع لسانك
محمد : اجل كل تبن وابلع لسانك بعد
نواف:ههههههههههههههههههههههههههههههههههههههههههههه ههههههههههه عايله نفسيييه
بندر دخل : خالي امي تقول تبي حلا تحط لك
محمد : حلا ايش !
نواف بضحك : والله اذا هو حلا رهام اللي ماتت عشانه تكفون كلوه وخلصوه ولا بتنهار
محمد بدقة قلب خدرته: جيبه جيبه
راح بندر ودخل المظبخ : يمه خالي يقول جيبوه
اخذت ثريا قطعه ودخلت رهام: لمين هاذي
بندر: لخالي
رهام اللي كان شكل الحلا ما يهيء : لا والله ما تودونه خييير شكله يفشل
بندر: يا بنت الحلال وخري بس الله يعطيه الاجر خالي دايم محد مسلك لك في ذا الخرابيط الا هو يستحي ويجامل
طلع ورهام اللي جلست وهي متفشله فشيلة العالمين
ومحمد اللي اول ماشاف الحلا كان شكله ماش والكل ما يبي لكن اكل الصحن ككككله وهو يدري انه بيرجعه كله شوي بس عشان ما تنهار رهام
................••............
في حارة عجاج
كان عجاج جالس بضييق قدام البقاله وجاء ابو حمود: عجاج وش بلاك لك ايام ضايق وثنيان معاد نشوفه عساه مافيه شي
عجاج : لا يا عمي ثنيان بخير وبخير كثير بعد
ابو حمود : اجل متهاوشين
عجاج : لا مانا متهاوشين
ابو حمود : والله يا ضيقك مب عاجبني اكيد متهاوشين ثنيان مايقطع يجي كل يوم ما قطع الا فيه شي
ثنيان اللي جاء ووقف ورا ابو حمود : ما تهاوشنا بس عتبانين
ابو حمود وقف : حي لله ثنيان
ثنيان: حياك الله
عجاج وقف : مع السلامه يا عمي
ثنيان لحقه وهو يوقفه : عجاج اسمعني
وقف ثنيان صوت جواله ورد وكان ابو الترف اللي قاله يتفضل وانهم موافقين عليه فرح ثنيان بس مب كثير وسكر وهو يناظر عجاج اللي سمع وخر يده : مبروك يا ثنيان انبسط انبسط ابد ما عليك من احد ابد
ثنيان: عجاج اترك حركات البزران عنك واسمعني
عجاج : انا خيرتك وانت اخترت
ثنيان:عجاج افهم وانا ادري وش تفكر فيه بالضبط لكن مافيه شي براسك صحيح
عجاج راح وترك ثنيان وهو عنده امل ان ثنيان بينسحب لكن ثنيان اللي عصب وطلع وهو متنكد مره
..................••............
في قرية الترف
عند سلوى ونوره اللي كانوا يسمعون سالفة الترف وهي تبكي بقهر وسلوى ساكته ونوره مصدومه
سلوى: الترف اكيد ما راح تاخذينه كلمي صالح
الترف : مقدر مقدر ابوي حلف حلف وانتي تعرفين ابوي
نوره: يا بنت الحلال انتظري يمكن صالح موافق
سلوى: لااااا صالح رافض
نوره: الترف اهدي وخلينا نفكر كيف نطلعتس من ذا الموضوع
الترف : انا مقدر اعترض على ابوي واللله بيذبحنا
سلوى: خليه يذبحتس ولا تتزوجين ذا الشايب
الترف : وش اسوي تكفون يا بنات
نوره: اسمعي ارجعي واطلبيه وترجيه يمكن يحن عليتس
الترف وقفت وهي تلبس : مالي الا ذا
طلعت متجهه لبيتهم دخلت لابوها وتقدمت وجلست : يبه تكفى انا بنتك الوحيده كيف ترضى لي ذا الزواج يبه هذا مو متزوج وحده او ثنتين لا ثلاث يبه كيف تبيني ادخل وابني حياه على دمار حياه
ابو الترف : اسمعيني يالترف زين وحطي كلامي في بالتس انا ابوتس وانا ادرى بمصلحتس وانا اتصلت على الرجال وبيجي في اقرب وقت ويجيب الشيخ معه وبيحدد زواجه
الترف اللي امتلت عيونها دموع وقهر: يبببببه حرام عليك
ابو الترف: اها ببس قومي زهبي القهوه
وقفت الترف وراحت وهي منهاره بكى منهاااااره ................••............
اما ثنيان اللي كان يدور من غير اي هدف بس يدور وهو يدري ان عجاج ما بيرضى عليه لين تتفركش الخطبه وكان ثنيان متأمل ان ابو الترف بيرفضه ويفكه لكن الموضوع انقلب ضده تماماً ابد ما حسب حساب زعل عجاج ما همه لو يزعلون اهله كلهم بس عجاج لا
رجع للبيت وضيقته واضحه جلس بالمجلس الخارجي وهو يقول : محمد خلهم يجهزون شاهي وجبه بسرعه
محمد : ابشر
راح محمد وبلغ منيره وقامت تصلح الشاهي
وطلعت مي لما عرفت بوجود ثنيان وراحت وجلست وهي متردده: ثنيان
ثنيان: مي اذا بتقولين كلامك التافهه انا مابي اسمع ولا تخليني اكمل اللي نقص
مي : لا لا لا ما رح اقول شي انا بس ابي اعتذر منك وابيك تسامحني ادري غلطاتي كثرت بس انت تعرف اني في وقت صعب ولخبطه وكل شي مدري كيف اتصرف ابيك تسامحني ونبداء من جديد
اعتدل ثنيان وهو يناظرها بهدوء : مسامحه يا مي
ابتسمت مي ووقفت بفرح : سويت فطاير مره حلوه بيجيبها لك
هز راسه ثنيان وهو يراقبها لما راحت ضحك بإستهزاء : معاد هي معك يا مي
................••............
بالمطبخ دخلت مي بفرح : منيره سويتي الشاهي
منيره: ايييه
مي : انتظري بجيب الفطاير بعد
منيره باستغراب : زين
ضحكت مشاعل بإستهزاء : حمدلله اخيرا ثنيان عطاك وجهه
مي : مشاعل مب شغلك خليك بكتابك اللي معك
مشاعل: شدي حيلك واركضي لثنيان
ضحكت مشاعل وهي ترجع لكتابها ومي اللي كانت مستانسه وتعدل وتبدل فالاغراض
طلعوا كلهم متجهين لثنيان اللي كان شاب النار وجلس حواليها هو وعياله
وجلسوا والكل كان ساكت وثنيان يفكر ومتضايق وقفت مي : انا بجدد الصحن
وقبل تمشي سمعت ثنيان يقول
ثنيان: بكلكم في موضوع يخصكم
منيره نزلت راسها اول ما فهمت الموضوع الانها تعودت على طريقة ثنيان
كانت مي واقفه على الدرج وبيدها الصحن وتنتظر ثنيان يتكلم وماشافها ثنيان اللي كان صاد وقال : جهزوا انفسكم لزواجي الرابع
كانت ولكم حريه انكم تحضرون او ما تحضرون ما حددت للحين لكن ببلغكم ومي لا احد يقولها انا بقول..
قطع كلام ثنيان طيحة مي المغمو عليها وفزت منيره تركض وركضوا لهم كلهم لكن وقفهم نزيف ميي وصرخت منيره وهي تقول :ثنياااان اللحق
ثنيان : جيبي عبايتها جيبي عبايتها
ركضت مشاعل وهي تجيب عبايتها ولفها ثنيان ومنيره وطاروا بها للمستشفى
ومشاعل اللي ما صحت من الصدمه الاولى عشان تستوعب الصدمه الثانيه