[نقـاء]

«البارت الخامس عشر »
.
.
في بيت ابو ثنيان
عند ام ثنيان اللي كانت معصبه معصبه حيل وهي من صبح الله تهاوش
دلال : يااا يمه يااااا يمه الله يخليك اهدي اهدي بيرتفع ضغطك
ام ثنيان وهي تضرب نوف : صبي القهوه زين ، خليني ضغطي يرتفع اخوك ذا بيذبحني بيجيب الجلطه ما بقى ولا رديه الا وتزوجها وحطها عله على قلبي
ثريا : وانتي صادقه يا عمه اجل اخر الفضايح يتزوج سودا
رهام: يمه الله يهديك ماله داعي ذا الحكي تراها انسانه زيها زينا وقبيليه بعد
ام ثنيان: وليته كذا طاردنا كلللللللنا من عندها ست الحسن والدلال
شوق: والله اذا بتعرفين ليه طردنا اسالي مي اللي بغت تسوي دراما وشاتها خالي
فجر: المتعه الوحيددده وجهه مي
نوف:رتوييييييييت
استمر النقاش الحاد المزعج وغضب ام ثنيان ما نزل .................••............
في الفندق
وعند ثنيان اللي حرفياً كان منهبل من تصرفات الترف وقف وهو يسحبها جلسها قباله : ممكن تركدين وتسمعيني
الترف ماتت اطارفها ماقدرت تقول شي وجلست ثنيان جلس على الطاوله اللي قدامها : اسمعيني يالترف اسلوب حياتك قبل تغييير تغييييير هذاك اول الحين لازم تتأقلمين على حياة جديده اطباع جديده ولازم تفهمين وش لك وش عليك ... وابتداء يتكلم ويشرح ويشرح وحياته ووضعه لكن صدمته الترف اللي وقف وقالت: اقول عطني بكلم صالح اكيد يتحراني
ثنيان 🙁 :هاه
الترف : تعرف رقمه صح والله مانيب حافظته
ثنيان لا شعورياً طلع جواله يدق على صالح وعطاها واخذته الترف وقالت : وبعد اطلع برا باخذ راحتي
ثنيان : باقي ما اخذتيها
الترف : لا
طلع وهو مصدوم وطاحت الترف ضحك ووتمالكت نفسها لما سمعت صوت صالح: هلا هلا براعي الصوت
صالح: هلاااااا والله حي لله الترف حي الله الغاليه
الترف اللي بدت تسولف معاه بكل حنيه وقالت له يعطيها سلوى وراح صالح لبيت سلوى وعطاها الجوال ونادى نوره
وبتدت الترف تاخذ راحتها معاهم وطبعا رجع ثنيان متوقع انها خلصت بس انصدم لما سمعها تقول : عاد اقولتس يا سلوى واخذ الفكس واتمسح به يوووووه لو تشوفيني افقع المراره وانكش الشوشه والبس الروز وحلفت الا ألوع كبده ذا الشايب وشوفة وجهه تنشرى بفلوس احسه شوي ويغمى عليه
سلوى:يمممه منتس يا الترف قلنا هبلي فيه بس مب كذا
الترف : ماعليتس ان ما فاد معاه ذا الله يعين نغير
كانت الترف مسترسله وتحش وتسولف وتضحك وناسيه ثنيان الل وراها
سكرت وهي تقول : يوه وش بسوي الحين
ثنيان من وراها: واووو ما يحتاج تسوين شي كفايه اللي قلتيه ! .
لفت الترف برعب وهي تناظره وضح الزعل في وجهه ثنيان وتقدم وجلس وهو ياخذ الجوال وسكره : اذا فيه مجال ادري وشوله ذا الحركات
رجعت الترف لوراء : اي حركات
ثنيان : اللي تسوينها
الترف وقفت بتروح بس مسك ثنيان يدها : انا اكلمك وترا ما زلت محترمك
هنا انفجرت الترف : لا تحترمني ياخي لا تحترمني وبعدين يدك لا تمدها علي
ثنيان: خير !!
الترف : وش يعني بتسوي
ثنيان راقبها بهدوء وترك يدها ووقف متكتف وهو ابتدا يفهم وضعها : ترا مهما كان الوضع هالعدوانيه مالها داعي
بعدت الترف شعرها : محد عاداك انت اللي تكلم من مخك
ثنيان : متاكده
ارتبكت الترف : فك يدي ياخي
ثنيان ترك يدها وقال : دامك نشيطه من البدايه اجل اجهزي بنروح لامي وابوي
راحت الترف بضيق وثنيان اللي ما فهم وضعها بالضبط بس يدري انها تسوي ذا الحركات عمد
بدلت الترف ولبست وطلعت وهي لابسه العبايه
وثنيان اللي كشخ وانتهى وجلس
الترف : زهبت
ثنيان ابتسم على كلمتها وقرب : وانا زهبت بعد
لفت الترف بسرعه وهي تقول بنفسها ( امسكي عمرتس يالترف لا يغرتس بضحكته و وجهه الزين )
ركبت وهي متوتره واعتدل ثنيان وهي يمد يده ويشغل المسجل وصدح صوت تامر حسني
بس مدت يدها ترف وهي تسكره لف ثنيان : وش فيك
الترف : والله محب ذا اللي يتلوى شغل غيره
وقف ثنيان وتكتف وهو يناظرها بالبرقع : وش اشغل طيب
الترف لفت بإنزعاجج من نظراته ( يالترف ما عليتس منه ذا سلوقي بيلعب عليتس وبكره يرميتس خليتس قويه ) : مدري حط شي صاحي مانيب خبلة اتسمع في ذا اللي مدري وش يحتسي
بدلها ثنيان وهو مبتسم كانت الترف متوقعه انه تطفره لكن كان ثنيان ماخذ البرود وضعه ومبتسم
.................••............
في بيت ابو ثنيان
الكل تجهز لما قال ثنيان بيجي وابو ثنيان على كثر ما سمع سب كان ينتظر ان الترف تجي بسرعه
جاء عمر يركض : جدي ابوي جاء
سيف : عجيب والله فرحانين بعرس ابوهم !
نواف : ليه وش مسوي ابوهم
ابو ثنيان: اصه انت بكره بتسوي زيه
سيف : امش بنسلم ونطلع
قابلوا ثنيان وسلموا وطلعوا ودخل ثنيان لابوه وخواته
وابتداء يسلم والترف وراه بشكلها اللي مستغربينه كلهم وبما فيهم الجد
لكن الترف نست خططها وهي تسلم على ابوه بحراره وترد عليه السلام بطريقته القديمه
كان ابو ثنيان بعد يعيش بصدمه لانه من زمان ما سمع احد من البنات يكلمه كذا
ثنيان اللي بعد ماسلم وسمع طريقتها مع ابوه ابتسم ابتسامه عريضه وايقن انها تمثل
تقدمت دلال: عطيني عبايتك يالترف مافيه احد
الترف : لا لا معليتس انا مرتاحه كذا
رهام : خذي راحتك ماعليك مافيه احد .
وقفت الترف وهي تعطيهم عبايتها وكانت عاديه اللبس بس الجمال طاغي
الكل كان يناظر وساكتين وكسر السكوت دخول ام ثنيان اللي كان وجهها اقشر سلم عليها ثنيان وقال: تعالي يالترف هاذي امي
الترف اللي من شافتها ما بلعتها ( ايييه واضح من قشر وجهها انها امك سبحان الله ): هلا يا خاله
سلمت ام ثنيان بضيق وجلست ورجعت الترف تجلس بعيد شوي عن ثنيان
رهام : كيفك يالترف ان شاء الله مبسوطه
الترف : حمدلله مبسوطه انتي وشلونتس
رهام ابتسمت : حمدلله
رجع الصمت والكل يناظر بهدوء وجاء محمد الصغير وهو يسلم على ابوه وقرب يسلم على الترف اللي وقفت ببتسامه وهي تسلم وجاء عمر وسلم وجلسوا
ثنيان: وين امهاتكم !؟
محمد : فالبيت
سكتوا من جديد وجات دلال وهي تحاول تفتح موضوع بس مافيه فايده
نوف بهمس :شوفوا خالي عيونه بتطلع هو يناظرها
شوق : مدري وش لاقي فيها
فجر: باين عليها حبوبه
وقف ثنيان: حنا سلمنا عليكم ونستاذكم بنطلع
ابو ثنيان: اقعد تغداء
ثنيان : لا سلمت تتغدا معكم العافيه
وقفت الترف وهي تلبس وطلعت ومشوا لكن وقفته الترف : السياره هنا يالطيب
لف ثنيان بإستغراب : الطيب !
الترف : اقول السياره هنا
ثنيان : لا لا بنمشي لبيتي
الترف ( ياللللليل خلصنا من امه الغثيثه بنروح بنروح لحريمه )كان ثنيان متعمد يروح وهو يبي يشوف اذا الترف اصلا بتجلس تعابط او بتستكن
دخل وهو يفتح الباب ووقفوا منيره ومشاعل بصدمه : سلام
منيره ومشاعل: وعليكم السلام اقبلت منيره وهي تسلم عليهم ومشاعل
وبعد السلام قال ثنيان: وينهها مي
مشاعل ببتسامه: بناديها الحين
طارت مشاعل لغرفة مي ودقت وفتحت مي : مشاعل شتبين
مشاعل: مب انا اللي ابي الترف تحت تبيك
راحت وتركتها وركضت مي لا شعورياً ونزلت وقفت بصدمه وناظرت الترف من فوق لتحت
ثنيان: شفيك وقفتي ماتبين تسلمين
مي بصدمه :على مين
ثنيان : وش تشوفين
مي : ما عليش خدي فيه حساسيه
انتبهت الترف للهجتها لكن ثنيان قال بصوت حاد : بنتصرف بحساسيتك بعدين
مي اللي حست انه عصب وتقدمت : امزح معكم
قربت تسلم على ثنيان والترف تناظر بإستحقار ومدت مي يدهها بتسلم على الترف بس قالت الترف : ما عليش اذا فيتس جرب لا تسلمين
ثنيان لف يناظرها لكن الترف ما اهتمت ومي اللي وقفت وقفت وبعدها اسنحبت بغضب
ومنيره مشاعل في صدمه ما توقعوا تبدا العاصفه من اللحظه الاولى
ثنيان : الترف وش ذا الحكي
الترف وهي تناظره : والله هي قالت معها حساسيه وحنا عندنا ما نعرف الحساسيه نعرف الجرب ونداويه ما عليك
منيره حست ثنيان بيسوي سالفه بس قالت: ان شاء الله بتغدون عندنا
ثنيان : لا بنطلع بس بنسلم
الترف وقفت وهي تلف طرحتها وتلبس وركبوا السياره وكان ثنيان ينتظر يوصل بس الفندق
دخلوا وجلست الترف بس وقفها ثنيان بقوه : اسمعني يالترف شرحت اليوم وضع زوجاتي وقلت لك وش عقاب قلة الحيا ورد الكلام
الترف : تونا بدري على الطق ياحضرة الضابط ولا تنتظر مني اني اسكت للمجروبه هاذي
ثنيان اللي كان بيفقد صبره بس تذكر توصية صالح وتذكر انها بدون ام ومايدري كيف تربت ومايبي يحوس الدنيا من بدري ترك يدها : انا كلمتك بهدوء وبرجع اكلمك مره ثانيه واشرح لكن مب الحين كل شي بوقته حلو
الترف انمغصت من كلامه وانسحبت وهي تسحب اللحاف تحت بتنام بس وقفها ثنيان : وبعدين يعني بتظلين تنامين تحت
الترف : والله قلت لك ألزم ما علي راحتي مانيب اداني ذا
ثنيان ابتسم ووقف وهو حاط يدينه ورا ظهره : اجل كبري لحافك
الترف : ليييه وش شاييفني ناقه هذا يكفيني ما يحتاج
تنحنح ثنيان: ايه بس ما يكفيني معك
حست الترف بدوخه وانسدحت على طول وهي تلف اللحاف: اقول رح لاهلك بس (بمعنى انقلع )
ثنيان طارت عيونه: اروح لاهلي
جمدت الترف ولا تكلمت وقرب وسحب لحافه وانسدح جنبها وهو مروق للاخير
والترف اللي جامده وهي ما توقعت ذا الحركه
ولما حست انه نام وتعبت وهي تفكر وش تسوي عشان تفتك تعدلت وهي تشوف اذا نايم وكان ناااايم انسدحت وهي تسوي نفسها نايمه وبكل ما عطاها ربي قوه رفسته وكأنها نايمه وما تدري
فز ثنيان وهو يصرخ وشافها نايمه لكن رجلها في جنبه غمض بألم وهو يدف رجلها ورجع انسدح ودخل في نومه من جديد وهالمره انقلبت الترف وهي ترفسه بالثانيه
صحى ثنيان بألم وهو يشوفها في سابع نومه ابتعد شوي وهو يبعدها ورجع ينام وماتت الترف ضحك وهالمره دفته اكثر وصحى ثنيان هالمره وهو يقول : وجع
قرب وهو يبي يتاكد نايمه ولا صاحيه ما تدري الترف كيف جمدت وثبتت بدون ما تضحك لكن عصبيه ثنيااان كان لها دور اخذ لحافه ورجع ينام على السرير
ابتسمت الترف وهي ما فيه نوم اصلا وانتظرت ساعتين لما اذن العصر وصحت وصلت وبدت تفتح الستاير وهي تقول بإزعاج : يلا يلا صلوا وانت نايم يلااا
صحى ثنيان وهو يناظرها وعيونه بالقوه تفتح : يصلون اييش
الترف : ياويييلي ويلاه ما تدري صلاة وش يا ويلتس يالترف طلع يهودي
اعتدل ثنيان بغضب : وش يهدويه انتي احد يقعد عنده عقل من ترفسيك
الترف بإستغباء: وش ترفيسه !!؟
ثنيان اللي ماسك جنبه بألم : ادري عنك
الترف : اقول لا تكذب بس ايييه ما تقدر نومة الارض وتحطها براسي هاذي مشكلتكم يالحضر
طالعها ثنيان بطرف عين وقام يوضي ويصلي ورجع جلس
وجت الترف جلست : اقول
ثنيان وهو باقي فيه نوم : قولي
الترف : نبي قهوه راسي بينفجر ما قندت راسي اليوم
ثنيان طلع وتركها بدون ولا كلمه نزل لرسيبشن وهو يطلب قهوه جلس فاللوبي ينتظر وهو يفكر( افاا يا ثنيان انت اللي لك هيبه في كل مكان تجي ذا السميرا وتحوسك وترد الكلام عليك ولا خلت شي ما سوته وانت ساكت والله لوهي وحده ثانيه كان قد كسرت رقبتها لكن مهما كان يتيمه وجاهله
حتى مقدر اشكي لاحد لو رحت لعجاج لعن ابو خامسي لكن هين انا اوريها ان ما هجدتك ما اكون ثنيان )
اخذ القهوه وطلع دخل وهو ينزلها وجلس وكان ساكت والترف اللي تسوي كل شي يطلع بيدها عشان طفره لدرجه انها صارت تاكل التمر وترمي النوى من الشباك وثنيان يراقب بهدوء وتوترت الترف من هدوءه
بعد انتهت وغسلت ورجعت قالت : الحين نبي شاهي
ثنيان : ايييه ابشري
طلب الشاهي والترف تشرب وتشرب وهي توترت من هدوء ثنيان وبعد ما خلصت جلست بهدو وقال ثنيان بنغزه: ايوه ما قلتي لي وين تبين تقضين شهر العسل ياعروس
الترف بتسرع : هنا
ابتسم ثنيان ابتسامه خبيثه فهمتها الترف وقالت بسرعه وغضب ؛ لا لا بنجلس عند امك وابوك ازين ولا في بيتك انت ما تقدر تترك اهلك من غير والي
ثنيان : ايه بس انا اعرف ان البدو عند كلمتهم الاولى
الترف : هذا اذا صاروا فاهمين
ثنيان بهمس : وش اللي مافهمتيه
وقفت الترف وهي تبتعد وثنيان يناظر بهدوء اربكها
................••............
في بيت ثنيان
عند مشاعل اللي تشققت من الفرح وهي تقول : قلت لك يا منيره قلت لك هذا هي بيض الله وجهه من يوم جت سممت مي
منيره:بس غريبه ثنيان ما قال لها شي
مشاعل : اييه يا حبيبتي توها عروس الله على ثنيان لا صار معرس لكن عطيه اسبوع تطلع جنونه
ضحكت منيره محمد : يمه ابوي متى بيجينا
منيره: مدري
عمر: يمه الحين زوجة ابوي هاذي بكره تطقنا
مشاعل: ليه يا امي من قال كذا
عمر: مي تقوله تقول هي اصلا سحاره
مشاعل: لا يا حبيبي هاذي عمتك زي مي بالضبط
محمد: اذا زي مي مانبيها
عمر: صح
منيره: لا يا حبيبي هاذي طيبه وان شاء الله تحبكم وتحبونها
مشاعل بهمس : والله ماعندي مشكله لو تفرمني بس تبرد قلبي في مي
منيره هزت راسها بضحك
.................••............
في بيت ابو محمد
عند محمد اللي كان فيه رقم مشغله ومزعجه برسايل حب رفع جواله وهو يفكر ( يا ربي لا تكون رهام بس رهام ما تسويها رهام وزينه وعاقله مستحيل تسوي كذا )
ادق ولا ما ادق يمكن هي وحتى لو هي يا محمد تعشم نفسك وبنت الناس
سكت على رساله تقول ( يحق لك ما ترد وانت معشم نفسك في رهام لكن لو تعرف حقيقتها بتمنى انك ماعرفتها )
اتسعت عيون محمد وكتب : من انت وش عرفك رهام
الرقم ( هههههههههههههههههههههه اوجعني قلبي من حنيتك هذا اسمها ولخبطتك اللي بقوله وش بيسوي فيك )
محمد دق بغضب وما رد الرقم لكن ارسل يقول ( قبل تعلق في بنت عمك اعرف وش وراها وانتم معطينها امان ) انقفل الرقم ومحمد اللي عصب وهو يشوف الرقم بهويه مجهوله وهو يفكر في كلامه لكن مستحيل يقتنع به
................••............
اسبوع مر على ثنيان من السبع العجايب مايدري كيف ثنيان صبر وتحمل وتمالك نفسه فيه اخذ الترف وراحوا مكه والمدينه لكن ماقدر يروح اي منطقه ثانيه من كثر ما سوت فيه الترف وطلعت عيونه وصل للبيت ونزل وهو ينزل شنطه الترف
نزلت الترف وهي تقول : حسبي لله تكسرت يديني ورجليني
ثنيان بطرف عين: بالله تكسرت من وشو يا قلبي
الترف : اول شي مانيب قلبك
ثنيان : اقول اطلعي اطلعي
دخلت الترف ببتسامه وهي اللي قدرت تصرف ثنيان طول الاسبوع ولا خلته يفكر حتى مجرد تفكير يقرب منها
منيره اللي كانت بإستقبالهم : هلا والله
الترف: هلابتس يا منيره
منيره: هاه كيفك مبسوطه ان شاءالله استانستوا
الترف: افا عليتس انسبطنا
دخل ثنيان وينزل الشنطه وتقدم وهو يسلم على منيره : مناير كيفك وحشتينا
منيره بخجل : مايوحشك غالي بخير انت كيفك
ثنيان: بخييير بس اني جوعان جوع وراسي مصدع وكل شي
ابتسمت منيره: ابشر روح بدل وتحصل كل شي جاهز
ثنيان: يعطيها العافيه ام محمد
الترف كانت تناظرهم ببتسامه وراحت ورا ثنيان اللي دخل الغرفه وهو ينزل الشنط ودخل يتروش والترف كانت تناظر بحماس للغرفه
وابتسمت لما شافت المغسله الخارجيه اللي تسليكها نفس تسليك الحمام”اكرمكم الله “ابتسمت ابتسامه عريضه وفتحت المويه الحاره ولا هي الا ثواني الا ثنيان يصارخ وسكرت المويه وركضت وطلع ثنيان ما حصل شي ورجع ورجعت تفتحته صرخ وطلع وسكرته وانحاشت
لبست وطلعت وهي تضحك قابلتها مشاعل:اوووه الترف وصلت اهلين
الترف:هلافيتس
مشاعل: هاه كيفك
الترف: حمدلله
مشاعل :وين ثنيان
الترف:داخل وانا قلت اساعد منيره
مشاعل قبل تتكلم سمعت ثنيان ينادي الترف وراحت مشاعل بنفسها ( الله بتساعد ماشاء الله بس من شاف الخايسه مي 9 شهور يالله جت تساعد )
الترف دخلت :نعم
ثنيان :انتي مريضه وشوله تفكين المويه وتسكرينها
الترف: ياااا ربي بدينا كذب متى جيتك اصلا ما اعرف المويه اللي تقولها
ثنيان :طلعي لي ملابس طيب
الترف:عشتوا اقول يالطيب صالح اخوي ماطلعت ملابسه طلع ملابس... ثنيان اللي عصب : اقوووول ابلعي لسانك واسمعيني زين سكت لك اسبوع بما فيه الكفايه عجلي سوي اللي اقوله والا والله والله ليتغير وجهي معك وتعرفين ثنيان صدق
جمدت الترف وطلعت ملابس اي كلام وراحت ولبس ثنيان ونزلت وراه
محمدوعمر اللي تو وصلوا من المدرسه ومعهم شهايدهم :يبه نجحنا
ثنيان : ماشاء الله مبروك مبروك
محمد :يبه بقولك وش تجيب هديتنا
ثنيان: وشروط بعد
عمر:هي حلوه مره يبه
محمد:خالي محممد مب حجز مخيم بنطلع بعد 3ايام
ثنيان:ايه
محمد:بنستاجر ملعب صابوني يبه تكفى نبي نفلها
منيره: تكفى ثنيان وافق ازعجوني ازعجوني يبونه
ثنيان:بس الدنيا برد
مشاعل :يتدفون ماعليك
ثنيان :زين اجل
الترف اللي كانت جالسه تناظرهم ببتسامه وقفت لما ابتدوا يحضرون الاكل
مشاعل :وين بتروحين
الترف : بساعدتس
مشاعل : لا حبيبتي اجلسي
الترف: اقول عطيني بس خل عنتس ما احب اجلس كذا
منيره :الله ييسعدك
حضروا وفي ذا الاثناء نزلت مي متباهيه وهي كعبها مسموع وكاشخه ناظرها ثنيان اللي دق قلبه من الجمال ابتسمت مي وقربت بتسلم على ثنيان لكن الترف بحركه غير متوقعه مدت رجلها بسرعه وبعدت مع الزحمه ولا احد انتبه وطارت مي وطاحت عند رجول ثنيان والكل يناظر بصدمه
ثنيان :بسم الله مي فيك شي
مي وهي ماسكه رجلها بوجع:ااااه رجلي يا ثنيان
ثنيان : وش فيك انتي ما تشوفين
مي وهي تناظر الترف :عمى بعيون العدو اكيد عين اكيد
مشاعل :شدعوه حبيبتي من بيعطيك عين بس انتي اللي تناظرين السماء ناظري زين
ثنيان :قومي اجلسي زين وبعدين وشوله ذا الكعب مع الدرج
عم السكوت من صوت شحاطة الترف اللي جايه من المطبخ معها مويه والكل ينتظرها وكان فرق الصوت بين الكعب والشحاطه واضح
.