[تاريخ الحب]

المغرب.. صحى ناصر و هو حاس بصداع مو طبيعي من كثر النوم.. نزل المطبخ قال للشغاله تسوي له كوفي.. وراح للصاله لقى خواته جالسين قدام التلفزيون... وماتكلم ولا كلمه.. لين جابت الشغاله الكوفي وشرب نصف الكوب...
ناصر : جيبي لي حبوب بندول.. مصدع مررره
نوره : وهي تطالع فيه .. طيب اخوي انت ماكليت شي .. اتغدى او كل شي خفيف بعدين خذ الحبوب...
ناصر : لا يكثر ..مابتجيبينهم والا خلاص مابي منك شي...
نوره : طيب طيب اقوم اجيبهم..
جابتهم وعطهتم اياه.. اخذ وحده.. وبعد دقيقه اخذ الثانيه.. ورمى العلبه على الطاوله وقام راح فوق..
ندى : هذا للحين ماتزوجوا وكذا اجل شلون لو تزوجو؟؟
نوره : تنهدت ... الله يستر..
راح واخذ له دوش بارد عشان يصحصح.. يمكن يطلع اللي شافه البارح حلم....

عند ساره .. بعد ماصلوا المغرب....... جلست تكلم شيماء على التلفون ..
شوي الا الجرس يندق بقوه..
راح تركي وفتح الباب..
دخل راشد ولقى ساره تتكلم في التلفون..
راشد : وانا صار لي ساعه ادق ويطلع لي مشغول.......
ساره : سكرت التلفون وقامت وقفت ونزلت راسها... هلا راشد..
راشد : روحي البسي بنروح نتمشى..
مشت ساره بدون ماترد عليه...
راحت ولبست مستعجله.. لبست فستان ناعم بني وقصير شوي من قدام وطويل من ورا .. كان محتشم شوي من فوق اكمامه تغطي الاكتاف مثل مايقولون جابونيز,,, وحطت كحل وماسكارا وغلوس وردي مايل للبني ,, ولبست وانتو بكرامه صندل كعب بيج وفيه ورده بنيه صغيره من جنب ولبست دبلتها ونزلت...
ركبت السياره وهو حط شريط اغاني ماعجبها ابد مطرب قديم وكلمات الاغاني سخيفه..
كانت طول الطريق ساكته.. وهو يتكلم شوي ويسكت.. وكل شوي يسألها انتي ليش ماتتكلمين..
راحوا الراشد.. وكلكم تعرفون الراشد..
راشد : ش رايك نتسوق شوي وبعدين نتعشى..
ساره : اوكي.
تمشوا شوي .. ساره شافت ساعه عجبتها.. وهو انتبه لها... جا وهمس بأذنها : ترى ماحملت فلوس كفايه لا تاخذي شي غالي..
ساره : في نفسها .. جايبني الراشد ويقول ماحمل فلوس كفايه.. ياناس الراشد الي يجي بس يتمشى اقل شي يحمل الف ريال.. وهذا يقول.. لاحول ولا قوة الا بالله.. ساره خلاص انسدت نفسها وماشرت شي..
قالها نطلع فوق تنعشى.. طلعوا فوق وكله مطاعم كان مليان شباب وكلهم عيونهم على ساره... هو حس بنظراتهم لها.. وقال يلا نمشي مافي عشا.... وش رايك نروح بيتنا اوبيتكم نقعد.. فهمت ساره هالشي .. قالت له تو الناس نتمشى شوي,,
ماعبرها وراح للسياره.....
ركبت وهي خلاص مو قادره ..
راحوا لبيت عمتها ام راشد .. وسلمت عليها وعلى بنات عمتها...
وقعدوا معاهم شوي.. بعدين راشد صرفهم ..
ساره : ليش تو الناس ...
راشد : وش تبين فيهم...وهو يقرب لها...
ساره : ماتدري من وين جابت الشجاعه وقالت هالكلام.. ماتحس ان تو الناس على هالاشياء؟
راشد : بعد شوي وهو مستغرب.. ليش؟ وبعدين انتي شرعا زوجتي...
ساره : عارفه لكن لسه ماتعرفت عليك.. وانت ماتعرف اي شي عني...
راشد وهو يفتح عبايتها... كل شي يجي بعدين..
ساره : تبي تبعده عنها .. وماقدرت.. وفجأه قامت وقفت...
وقالت: ابي اروح البيت...
راشد : شافها متضايقه قال مافي فايده... وقام وصلها بيتهم ونزلت بدون ماتقول شي..
وهي داخله البيت شافت سعد.. مسكها من كتفها ...
سعد : شفيك..
ساره وهي تبكي: خلاص.. لا اسبوع ولا حتى ساعه ... ابي افك الخطوبه..
سعد : حضنها.. وقالها .. طيب عشاني.. كملي اسبوع..
ساره : عشانك بس..وراحت لغرفتها...
سعد : طلع جواله ودق على راشد.. ممكن اشوفك اليوم؟
راشد : اكيد... تحب اجيك بيتكم؟
سعد : لا انا اجيك..
راح لبيتهم.. في البدايه كلمه عن اخته كيف هي خجوله مرره حتى من اخوانها..
راشد : طيب وشنو تبيني اسوي لها يعني؟
سعد : البنت لسه صغيره.. خف عليها شوي....... يعني حركات الشباب مالها داعي هالوقت على الاقل تعرف عليها شوفها شنو تحب وتكره.. يعني اشياء شخصيه فيها.. والشغلات الباقيه لاحق عليها بعد الزواج انشاءالله.....
راشد : طيب.. في نفسه(يعني قالت لك كل شي)
مشى سعد... وراشد لسه ماغير رايه.. اكيد في شي ثاني....
اليوم الثاني
في المدرسه.....
شيماء : ماسكه ساره من شعرها.. يالخاينه امس تسكرين التلفون في وجهي وبعدين اتصل تقولي اماني انك طالعه مع خطيبك.. اشوف من الحين بديتي تنسيني ..لازم تعدلين ...
ساره : ........والله انك فاضيه..
شيماء : ساروه شفيك؟
حكت لها ساره عن الي صار امس في الراشد...
شيماء: جن هذا ........ صحيح انه مايستاهلك....
ساره : خلاص انا قررت..
شيماء : انتي ادرى بمصلحتك.......
.........
عند ناصر ..
ابوناصر : شفيك يبا عسى ماشر؟
ناصر: والله اني مو عارف شقول لك....
ابوناصر : خير انشالله...
ناصر : انا غيرت رايي... ماعاد ابي اتزوج هيفاء.....
ابوناصر : وقف ... انت شنو تقول؟؟؟؟؟؟؟؟؟؟
ناصر : وقف .. يبا .. اللي سمعته...
ابو ناصر : وش تبي عمامها يقولون عنا مالنا كلمه... خاطبين البنت وشفناها ... شوف لا اسمع هالكلام مره ثانيه سمعت.... هذي بنت عمتك و يتيمه وانت اولى فيها من الغريب.....
ناصر : نزل راسه مافي فايده......
راح ابوه وهو رمى نفسه على الكنب محتار ويحس الارض تدور فيه.....

......
رجعت ساره من المدرسه لقت امها جالسه بالصاله وحاطه يدها على خدها...
سلمت عليها : يمه شفيك؟
ام عبدالرحمن : اخوك بدر تعبان شوي.....
ساره : ووينه الحين..
ام عبدالرحمن : في غرفته .. تو جاي مع ابوك من المستشفى..
راحت له على طول... دقت الباب..
بدر: بصوت تعبان.. مييــ ـــن؟
ساره : انا..
بدر : ادخلي ساروه... ودخلت وكانت لسه بمريول المدرسه البني...
لقت نايم ووجهه اصفروعيونه ذبلانه وفي يده اثر ابر ومغذي وعلى الكمودينه حبوب وادويه....
بدر : وش هاللبس كأنك سياره كابريس قديمه..
ساره : ههههههههه اللي يرجك.. شلونك الحين؟
بدر : والله اللي يشوف مريولك مايشوف خيرر.. الحمدلله احسن..
ساره : طيب اخليك الحين تريح .. باي
بدر : باي يالدبه....
ساره : والله لو ماكنت تعبان كان وريتك.....
بدر : ههههه.. ونام..
طلعت ساره من عنده وقلبها يتقطع عليه .. يمزح ويسولف معاهم حتى وهو تعبان .. مايبي يبين لهم قد ايش تعبان ويتألم.....
راحت لغرفتها وبدلت ملابسه وانسدحت على السرير.. تبي تنام لها شوي ماقدرت......
نزلت تحت لقت امها وابوها واماني واخوانها يتغدوا,, وتركي فاتح سالفه ......
راحت المطبخ سوت لها سندويش جبن وشاي وهي طالعه الدرج سمعت التلفون يرن...بعدما دخلت غرفتها ..سمعت الباب يندق
ساره : مين؟
تركي: انا ودخل.......خطيبك يبيك على التلفون..
ساره : قوله نايمه...
تركي : لا والله تبيني اكذب.. تكتف.. اسمحي لي..
ساره : تروك حبيبي انت...
تركي : امممم .. بعشرين...
ساره : حرام عليك..
تركي : اجل .. بروح اقول له تقول انها نايمه... وبحط شوية بهارات من عندي..وهو يرفع حاجبه
ساره : خلاص بعطيك اللي تبي بس روح...
راح وهي تنهدت بقوه......
دقايق ونامت....

عند ناصر ...
ابوناصر : لازم اليوم نروح بيت ابوعادل نحدد موعد الملكه والزواج...
ناصر : اللي تشوفه يبا...
قام وراح لغرفته.. مسك جواله ودق على امه في بريطانيا... فضفض لها هي امه واخته وصديقته وكل شي.. بعدما سكر من عندها حط راسه على المخده.. يبي ينام... انتبه للعلبه الصغيره اللي على التسريحه,, الخاتم اللي اشتراه هديه لبنت عمته.... طالع فيه ....وضحك على نفسه..... سكر العلبه ورماها بكل قوته على المرايه ..... تكسرت المرايه...... وطاح الزجاج على الارض
جات نوره : شفيك اخوي؟؟
كان حاط ايدينه على التسريحه ومنزل راسه
انتبهت للعلبه وللخاتم اللي طاح من العلبه..
ناصر : مازال منزل راسه ..بصوت واطي لكن كله عصبيه وقهر.. مافيني شي ,,.
نوره : لكن اخوي..
ناصر : بصراخ.. روحي عني
طلعت نوره.. وهي ميته خوف على اخوها لا يصير فيه شي...
بعد يومين ..
اليوم ملكة ناصر وهيفاء وبعد اسبوع الزواج.. امها مسعجله وكأنها تبي الفكه منها عشان تبي تتزوج..
ناصر كانت عيونه ذابله ودايم سرحان.. لبس ثوب ابيض وشماغ.. وراح مع ابوه بيت ابوعادل.. بعد ماخلصوا مع الشيخ جو خواته عشان يدخل يلبس هيفاء الشبكه..
اول مادخلوا انصدموا من لبسها.. اذا ساره بان صدرها غصب عنها هاذي متعمده تبين مفاتنها.... كانت لا بسه فستان احمر مخصر على جسمها كله.. ومن فوق فيه سيور في الرقبه لكن فتحة الصدر واسعه مره.. والفستان قصير فوق الركبه بواجد وعليه قطعة دانتيل شفاف طويله ومفتوحه من قدام من الوسط ..يعني وجودها زي عدمها.. طبعا المكياج قوي مرره والروج احمر مثل الدم
ناصر انذهل من اللي شافه.. حتى مو منزله راسها ولا مستحيه.. حلاة البنت بخجلها...
دخل ولبسها الشبكه بدون مايقول ولا كلمه طبعا هي كانت تحاول تقرب منه وتتلصق فيه بس كان ثقيل معاها..
بعد ماطلعوا خواته.. جلست و حطت رجل على رجل.. وبانت فخوذها .. ناصر انحرج ولف على الجهه الثانيه.....
شوي وكلمها بدون مايطالعها: شلونك مع الدراسه...
هيفاء انجت على صوته القوي بس فيه بحه شوي: نص نص..
ناصر : يعني شلون نص نص؟
هيفاء : ليش ادرس واتعب عمري.. ابوي ترك ورث وخير وانت ابوك عنده فلوس ماتاكلها النيران.. وشو له الدراسه والتعب والهم..
ناصر : انصدم من كلامها .. بس على الاقل خذي شهادة الثانويه..
هيفاء : وش اسوي فيها اعلقها على الجدار.... وانت لو ما ابوك مدير الشركه كان للحين ماسك شهاداتك وتلف من مكان لمكان تدور وظيفه.....
ناصر : سكت.....ماعنده كلام يقوله بعد اللي سمعه.....
هيفاء : بحماس .. الا ماقلت لي وين بنروح شهر العسل..
ناصر : وين ودك تروحين؟
هيفاء : امم نروح باريس او روما.. اهم شي بلد اجنبي عشان الواحد يرتاح من العبايه والحجاب اووووووف.....
ناصر : انصدم اكثر ولف عليها...ايشششششششششش؟؟؟؟؟؟؟؟؟؟
هيفاء : ذابت فيه رغم ان عيونه ذبلانه الا انه وسيم ... قالت بدلع ليش انت مو متحرر؟؟؟
ناصر : متحرر؟؟ اسمعي انا عايش عمري برا ايه .. بس هذا مو معناه اتخلى عن ديني واخلاقي والعادات والتقاليد الي تربينا عليها.....
هيفاء : لا تتكلم مثل الشياب وبعدين امك مو سعوديه..
ناصر : مو سعوديه اي نعم .. لكنها اسلمت بعد ماتزوجت ابوي... وربتني احسن تربيه.....
هيفاء : حركت يدها بلا مبالاة .. وانا اللي اقول بتزوج واحد متحرر وفري طلعت خرطي مثلهم.....
ناصر : قام وقال لها.. شوفي احترمي نفسك ولا تقلين ادبك معي فاهمه .. وطلع..
هيفاء على طول طلعت جوالها ودقت على خالد وقعدت تسولف وتضحك معاه...
ناصر ركب سيارته.. وهو خلاص مو قادر يتنفس فتح النوافذ وفتح ازرار ثوبه الي فوق..
بيرجع البيت لكنه غير رايه وش راح يقولون اهله .......
راح لستار بوكس يشرب قهوه يمكن يتعدل مزاجه...
دخل ستار بوكس وطلب له اميركان كافيه ..
جاب الجرسون القهوه وحطها.. وناصر يفكر ويحط دماغه بينشل من التفكير.. وبردت القهوه وهو مالمسها.. في نفس المكان
كان واحد جالس في الزاويه على طاوله.. وماسك الجوال ويكلم وهو يبتسم..
خالد : هههههههه وليش قام وراح عنك؟
هيفاء : مدري عنه الغبي... بس فكه منه مالي خلقه ...
خالد : الا ماقلتي لي متى ....
هيفاء : قلت لك بعد مااتزوج مايصير ادخل وانا مو بنت بنوت.....
خالد : في نفسه .. من وين نازله الاخلاق اليوم.. قال : طيب قلبي انا بروح اجيب لي شي اشربه .. اكلمك بعدين..... باي..
هيفاء : باي ياحبي وعطته بوسه من السماعه..
خالد : سكر التلفون وشوي بيتفل عليه.. انتبه لناصر اللي كان قاعد ووجه مبين عليه التعب والهم .....
خالد : ناصر .. هلا الحمدلله على السلامه .. مبروك..
ناصر : قام بشويش.. هلا خالد الله يسلمك... من وين سمعت؟
خالد : ارتبك . . هااا.. لا شدعوه هذا شي مايتخبى ماتبينا نفرح لك..
ناصر : تسلم.. عقبالك
خالد : والله ودي اقعد اسولف معاك لكن مستعجل..
ناصر : لا شدعوه .. خذ راحتك..
خالد : مع السلامه ..
ناصر : مع السلامه ..
طلع خالد وركب سيارته وكلم هيفاء.. اتحداك من شفت من شوي..
هيفاء: منو ؟
خالد : خطيبك المملوح..... وقعد يسولف معاها.. ولا همه انها صارت خطيبة صاحبه,, او اللي كان صاحبه,,,,,

ساره لها يومين مطنشه مكالمات راشد.. وبدر صار احسن..
بالليل كانت قاعد مع فاتن وبدر وتركي .. طبعا تركي ماسك سالفه وهم كل شوي اسكت عورت راسنا وهو يقول بس هالسالفه اكملها.... الا التلفون يرن .. محد قام.. قامت ساره وببالها يمكن شيومه..
ردت : الو..
راشد : الو السلام عليكم...
ساره : وعليكم السلام..
راشد : بجفا.. ليش صار لك يومين ماتكلميني..
ساره : ببرود .. عندي امتحانات..
راشد : طيب ابغى اشوفك اليوم..
ساره :......
راشد : الووو
ساره : معك.. طيب بس لا تطول لأن عندي امتحان بكره..
راشد : امتحان شنو؟
ساره : رياضيات..
راشد : طيب نص ساعه وجاي..
سكرت السماعه بأقوى ماعندها.. حتى مايدري اذا كانت علمي او ادبي .. لو يدري كان عرف انها كذابه.. كيف رياضيات وهي ادبي..
راحت ولبست لها بنطلون جينز و قميص كاروهات اسود وابيض طويل فيه حزام ابيض من الخصر.. ولا حطت لها مكياج ولا شي ونزلت وقالت للشغاله تجهز الشاي والقهوه والطفايه (لازم) وقعدت تستناه.....
جا راشد ودخلته المجلس وجلست بعيده عنه شوي.. وهو ماقال شي ..
راشد : وش هالكلام اللي قاله سعد؟؟
ساره : اي كلام؟
راشد : انتي عارفه..
ساره : سكتت.......
راشد : المفروض ان هذا شي طبيعي لكن انتي تبين تسوين مشكله وبس..
ساره : فترة الخطوبه عشان الازواج يتعرفون على بعض.. وهالاشياء تجي بعد الزواج.. وانت ماتعرف عني ولا شي..
راشد : طيب تكلمي عن نفسك..
قعدت تتكلم عن نفسها لكن حسن انه مو معاها وسوى كذا عشان بس يسكتها.. وهو كان يناظرها بلا مبالاة وبرود.. وكل شوي يسألها اسأله ترفع الضغط..
قعد ساعتين طلع روح ساره من ثقالة دمه.. وبعدين قالها انا ماشي .. قامت على طول.. تبي الفكه..
راشد : مافي بوسه تصبرني..
ساره : لفت وجهها وماردت عليه..
سحبها لعندها وباسها بالقوه في شفاتها.. حاولت تقاوم وماقدرت.. بعد ماخذ اللي يبي ابتسم وراح
راح ..
وعلى طول راحت الحمام ورجعت اللي ببطنها... لاعت كبدها من ريحة الدخان اللي ماليه انفاسه.... خلاص لهنا وخلاص.....
يوم ثاني ......
تهاوشت ساره مع فاتن.... هواش خوات عادي..
شوي دق راشد وقالها بجيك الحين..
قالت طيب.. مابقى الا يوم واكمل اسبوعين وبعدين اكلم سعد ينهي هالموضوع..
ساره متعوده على اخوانها صحيح كل واحد فيهم شخصيه قويه ويهز البيت بكلمه منه لكن اذا بكت مايقدروا على دموعها حتى لو على شي تافه كل حنُية الدنيا فيهم ..
جا راشد وقعدت في كنبه منفرده.. وهي ساكته ومبين عليها انها متضايقه..
راشد : اش فيك ؟
ساره : ولا شي..
قرب لها وجلس قدامها ..لازم اكون انا اول واحد يعرف همومك ومشاكلك نسيتي اني زوجك..
ساره هنا ماقدرت تمسك دموعها.. بكت وهو يطالعها بلا مبالاة..
قالت له عن هوشتها مع فاتن..
شوي الا هو يضحك بصوت عالي .. ضحك ضحك ضحك حتى ساره رفعت عيونها تطالعه.. مستغربه.. ليش يضحك؟؟
راشد : انتو البنات تبكون على اتفه الأشياء.. يلا قومي غسلي وجهك وتعالي جنبي ابيك شوي....
ساره .. مستحيل .. شنو هذا .. ماعنده شخصيه .. ولا يراعي مشاعري ... مستحيل اعيش مع شخص مثل هذا طول عمري..
بعد مامشى بيتهم
ساره راحت تنام وهي مصممه تنهي هالخطبه....

عند ناصر....
طول الأسبوع اللي بين الزواج والملكه ماكلم هيفاء وهي ماهمها عندها الف واحد غيره تكلمه,.
اليوم زواجه...
طبعا هيفاء سوت حفلة خطوبه وزواج كبيره بعكس ساره اللي كان خطوبتها عائليه..
في صاله من صالات الدمام الفخمه دخلت هيفاء وفستانها يظهر اكثر مما يخفي من فوق.. اغلب الناس انتبهوا لها انها كانت عاديه مافيها خجل العرايس.. دخلت على موسيقى كلاسيك.. وبعدها دخل ناصر كان يومين مو نايم وعيونه ذبلانه.. ولابس الثوب والشماغ والبشت .. كل البنات حولوا انظارهم عليه .. وهو ماشي كله شموخ وكبرياء ..وهو يناظر عروسته.. وهي تطالعه من فوق لتحت..
بعد الزفه راحوا للفندق ..
ناصر: مبروك ..
هيفاء : الله يبارك فيك .. وهي حاطه عينها بعينه.....
ناصر : طيب ماودك تبدلي ثيابك عشان نتعشى؟
هيفاء : بدلع ماصخ ..شرايك انت تبدل لي
ناصر : شنو؟؟؟؟؟؟
وبعدين قال .. لا ..عشان تاخذي راحتك..
هيفاء : طيب دقايق بس..
راحت للغرفه وهو رمى نفسة على الكنبه ومو مصدق اللي يشوفه ويسمعه..
شوي نادته هيفاء.. ناصر حبيبي ممكن تجي..
قام وهو يجر رجوله جر: نعم..
هيفاء : ممكن تفتح لي فستاني..
ناصر: وانتي ليش ماتفتحينه؟
هيفاء: اخاف يخرب اظافري .. ولفت له..
ناصر : انقرف من حركتها.. فتح السحاب بسرعه.. وطلع..
دقايق ورجعت لا بسه روب نوم قصير وشفاف.. يظهر اكثر ممايخفي
ناصر طالعها: اللهم طولك ياروح.. بتتعشين كذا وهو يأشر بأصبعه عليها من فوقها لتحتها..
هيفاء : وليش لا .. وبعدين انت زوجي .. حتى لو اتعشى بدون ملابش عادي..
ناصر :.................................................
قام وسفههها وراح لغرفة النوم يبدل ثوبه .. لبس بيجامه سودا وراح للصاله وطلب لهم العشا.. طبعا طول العشا هيفء تتدلع عليه .. لقمني.. ذوقني وهو خلاص مو قادر......
بعد ماتعشوا قعدوا قدام التلفزيون وهي لاصقه فيه.. وهو مستغرب من حركاتها.. معقوله وهذي اول مره اقعد معاها.. هي انجنت عليه تغير عن آخر مره شافته قبل كم سنه زادت حدة ملامحه ونظراته.. وعطره اللي يدوخ ..
هيفاء : انا بروح غرفة النوم..
ناصر : طيب انا بطفي التلفزيون وبجي..
راحت .. وهو دقايق وراح للغرفه.. استغرب من اللي شافه..
لقاها منسدحه على السرير و........
هيفاء : شفيك ؟؟ ماراح تقرب مني..
ناصر : ...............
تقرب منها......
وفي النهايه قام وطلع من الغرفه....
هيفاء : وهي مقهوره.. شفيه هذا لا يكون عاجز وانا مدري....
ناصر: اش فيني ... ماقدرت اقرب منها.. معقوله اكون عاجز او فيني شي.. لكن اسلوبها وحركاتها مايرضى فيها اي رجال شرقي...
شوي جات وقعدت في حضنه...
هيفاء: شفيك حبيبي .. ماعجبتك....
ناصر: ولا شي بس....
هيفاء: شنو ....
ناصر : خلاص يلا نروح الغرفه...
وراحوا وطفوا النور...........

في اليوم الثاني .. صحى ناصر قبلها اخذ له دوش.. وقعد بالصاله..
اللي صار امس مو رغبه مني فيها عشان بس اثبت لها اني رجال...
لكن ليش انا مو بسوط.. هذي حبيبة القلب ...
صدقت نوره... لكن الحين هالكلام ماينفع خلاص هي الحين زوجتي...
كان حجز لهم رحله الى باريس وروما وجنيف....
رن جواله... كانت اخته نوره اللي متصله....
ناصر : هلا نوره..
نوره : بصوت كله بكى.. ابوي ..ابوي....
ناصر : وقف.. بصوت عالي .. شفيه ابوي؟؟؟؟
نوره : دخل في غيبوبة سكر......
ناصر : انا جايكم الحين ... سكر الجوال قبل ماترد عليه...
راح لهيفاء.. يصحيها..
هيفاء قومي يلا..
هيفاء: شنو شتبي..
ناصر : قومي نروح بيت ابوي.. ابوي بالمستشفى.....
هيفاء قامت: لا والله وشهر العسل..
ناصر : ووده يعطيها كف .. اقولك ابوي بالمستشفى تقولين شهر عسل...
هيفاء : بس انت وعدتني....ولا انت مو رجال ولا قد كلمتك .. قالتها وهي تطالعه بنظرات احتقار..
ناصر : وش قصدك؟
هيفاء : ولا شي بس ماله داعي اذكرك .. بالبارح.....
ناصر : مسكها من كتفها بقوه .. شوفي والله لو ماكنتي بنت عمتي كان علمتك الأدب .. فاهمه
هيفاء : وهي تبعد يده بلا مبالاة ..... اووووه فكنا ياشيخ رووح لأبوك لا تبكي عليه.. وانا مالي خلق مستشفيات..
تركها ناصر لأن مافي فايده من الكلام معاها...
راح لبس له بنطلون جينز وقميص ابيض وفتح الازرار الثلاثه اللي فوق وجاكيت اسود.. وطبعا ماننسى ساعته الفخمه اللي مستحيل يطلع بدونها.....
شافته هيفاء وهو طالع ... ذابت على لبسه ووسامته حتى وهو معصب يهبل..
لكنه مايملى عينها...
ناصر : انا رايح اشوف ابوي وراجع ولا تتحركي من مكانك.. فاهمه..
هيفاء : بدلع .. اوكي حياتي.......
طلع بدون مايرد عليها.. كلم نوره : ابوي بأي مستشفى..
نوره : اخوي ماله داعي تجي ابوي صار احسن ....
ناصر : اخلصي انا في الطريق.. قالت له وين وراح..
ولما وصل لقى خواته وام فهد وفهد اخوه ..
فهد : تو الناس.. يلا انت استلمهم انا بطلع وراي شغل...
ناصر: في نفسه .. مستحيل يتحمل مسؤلية شي ابد لا ويقول شغل اي شغل وانت طول ليلك سكران تنهد الله يهديك بس.....
جا لعند ابوه وحب راسه..
ابوناصر: ليش جيت ياولدي وانت معرس...
ناصر : افا انت ابو ناصر مافي اغلى منك.. ارتاح ولا تشيل هم الشغل..
ابوناصر: ليش ماراح تروحون شهر العسل..
ناصر : اي سفر وانت تعبان.. كل شي يتأجل ..اهم شي عندنا صحتك وراحتك..
ابوناصر: فهد يمسك الشغل..
ناصر : يبه انت عارف ان فهد عمره مادخل الشركه ولا يعرف شي فيها.. لا تشيل هم وارتاح.....
سكت ابو ناصر وام فهد... هذا اللي ربته اجنبيه وعاش طول عمره برا يطلع رجال من ظهر رجال.. واللي تربى ببلد الأسلام والمسلمين يطلع راعي بنات وشرب.. كله من اصحاب السوء..... الله يهدي الجميع......

عند ساره اهلها بعد ماعرفوا انها تبي تفسخ الخطبه.... امها زعلت منها وخواتها تعبوا وهم يكلموها وعبدالرحمن عصب عليها..... بس مافي فايده خلاص هي مصممه.....
ام عبدالرحمن : يابنتي انتي توك صغيره وبتتطلقي؟
ساره : اتطلق الحين احسن مما اتزوجه وارجع لكم بعد كم شهر وعندي ولد او حامل.. يمه افهميني انا مستحيل اتجاوب معاه...
سعد : خلوها على راحتها....
ام عبدالرحمن : العايله بتتكلم بسيرتنا.. وبتصير مشاكل..
ساره : ماهمني...
راحت تكلم شيماء
شيماء : هااا
ساره : وجعاه.. قومي تعالي..
شيماء : مو جايه اهلك الحين تلاقينهم معصبين والجو عنكم مكهرب.. سوري لا تزعلي مني ... تعالي انتي....
ساره : ياغبيه انتي قلتيها الجو مكهرب.. يعني مستحيل اطلع...
شيماء: خلاص خليها وقت ثاني..
ساره : اوكي باي.....
راحت غرفتها وجلست على سريرها.. وهي تفكر اللي اسويه صح او غلط...
بصير مطلقه.. يمكن ماحد يرضى يتزوجني بعدها.... يووه احسن فكه.. اخلص ثانويه واكمل دراسه واشتغل احسن.......
شوي قطع عليها تفكيرها اماني اختها : تلفون لك ..
ساره : منو؟
اماني: راشد..
ساره : شنو يبي؟؟
اماني: ماادري انزلي كلميه...
ساره : وهي تقوم مالي خلقه اش يبي بعد اكيد سعد وعبدالرحمن كلموه..
نزلت وخذت السماعه وهي مو طايقه تتكلم او تسمع صوته...
راشد : السلام عليكم..
ساره : هلا وعليكم السلام..
راشد : صحيح اللي قاله لي سعد تبين ننفصل؟
ساره : ببرود .. ايه..
راشد :طيب عطيني سبب..
ساره : احنا مستحيل نتفاهم مع بعض.. ومختلفين في كل شي..
راشد : عصب من برود ساره.. وقال طيب خذي رقم خالي (اللي هو عم ساره) وتفاهمي انتي معاه انا ماافهم في امور الطلاق والزواج...
ساره اخذت الرقم وسكرت التلفون وراحت غرفتها تبكي.. طاح اكثر واكثر من عينها.. يعني ماعنده شخصيه ومايقدر يخلص اموره بنفسه.. شنو هذا مو رجال.... صممت اكثر واكثر على رايها...

هيفاء بعد ماطلع ناصر مسكت الجوال الثاني وقعدت تكلم خالد.. شوي رن جوالها العادي كان ناصر متصل فيها.. لحظه خلودي اشوف البيه شنو يبي.. ضحك خالد : طيب..
هيفاء : هلا حبيبي..
ناصر : جهزي اغراضك بجي آخذك مافي سفر..
هيفاء : بعصبيه.. وليش انشالله؟؟
ناصر : احترمي حالك .. وابوي مريض .. اي سفر واي هم..
سكره بوجهها .. وهي قعدت تسب فيه وتلعن .. وسكرت مع خالد ودقت على امها..
هيفاء : شفتي.. ماراح يوديني شهر عسل..
ام هيفاء : ليش؟؟
هيفاء : يقول ابوه تعبان..
ام هيفاء: اكيد بتروحون بعد مايقوم ابوه ولا تنسي انه ماسك امور الشركه..
هيفاء : طيب يلا باي بقوم اجهز اغراضي.. جهزت اغراضها ولبسي فستان اسود ضيق فوق الركبه.. دقايق وجا ناصر.. واخذ الشنط بدون مايكلمها ونزل معاها..
عند المواقف ناصر كان يعدل الشنط وهي واقفه جنب السياره ماركبت.. هب هو قوي طير عبايتها وبانت سيقانها.. وبالصدفه شباب مارين وقعدوا يصفرون.. وهي طبعا ضحكت..
انتبه ناصر للموقف اللي صار راح ومسكها من كتفها وركبها السياره بالقوه ولما ركب السياره قال وهو معصب: انتي ماتستحين على وجهك.. ليش ماركبتي السياره على طول.. وتضحكين بعد..بصراخ .. ردي؟
هيفاء : اوووف.. لاتقعد تنفخ علي من الصبح ... كفايه انك ماسفرتني بعد تنفخ علي.. فضلت ابوك وشركتكم علي وناستي ..
ناصر : اسكتي ومابي اسمع صوتك.... مشوا لين وصلوا البيت ونزلها وراح للشركه....

بعد اسبوع...
طلع ابوناصر من المستشفى .. واليوم موعد المحكمه عشان ساره تتطلق من راشد..