قصيدة الستيرة ..
من القصائد الجميلة للشاعر خالد المريخي
يتحدث عن البنات العفيفات ..
على كثر ماحب شوف المزايين
صرت افرح ان واجهت بنتٍ ستيرة
والله من جابتني امي لهالحين
ماجت عيوني في عيون القصيرة
تمنعني الشيمة ويمنعني الدين
عندي على كل العفيفات غيرة
رفعت نفسي عن دروب الرديين
وسلكت درب اهل الوجيه السفيرة
قلبي تعلق في صفوف المصلين
ورفيقي القرآن في كل ديرة
إذا بغيت اقنع براي الحكيمين
صليت لله ركعتين استخيره
والله لو شفت الخطا شوف بالعين
ماجبت لاعراض الأجاويد سيرة
من طق بالأقصى يطق الموالين
ومن هان نفسه يفرح ان هان غيره
الشمغ واجد والنشاما قليلين
والطيب كايد والمراجل عسيرة
الطاهرة تسوى بعيني ملايين
وفي وسط قلبي منزلتها كبيرة
والخايبة لو انها شيخة الزين
مهما تسوي في عيوني صغيرة
إذا تعزووا بالخوات العزيزين
الرابح اللي يعتزي بالستيرة