رواية تهزمني السمراء وأنا نّد فرسان

[نقـاء]

«البارت الثاني عشر »
.
.
في ديرة الترف
وعند صالح اللي كان متوقع ابوه يمكن يغير رايه دخل وهو يقول : يبه بكلمك في شغله
ابو الترف : انا اللي بكلمك تجهز يمكن ثنيان يجي يملك بأي وقت
انصعق صالح من كلام ابوه: نعععم يبه وش تقول انت الله يهديك يا يبه انا عجزت وانا اشرح وافهم يا يبه الناس ما بتقبل الترف يا يبه كيف تبينا نزوجها كذا
ابو الترف بقرار حازم: والله يا صالح ان فتحت فمك في ذا الموضوع ولا ناقشتني فيه ان ابراء منك عمري كله
ضرب صالح الباب بغضب وطلع متجهه لترف دخل المطبخ وراح لترف وهو ياخذ الصينيه منها ويرميها غسل يدينها من الصابوون وهو يقول : الترف اتركي كل شي واسمعيني يالترف ابوي بيزوجتس واحد متزوج وعنده عيال وانتي ارفضي يالترف ما يصير تزوجينه سمعتيني لا يغرتس ابوي باي شي انتي ما تصلحين لذا الرجال سمعتيني
الترف بحزن وجمود الدنيا لما شافت صالح عاجز ولا قدر على ابوها عجزت هي بعد : انا موافقه ياصالح
صرخ صالح بصدمه: نعم وش تقولين انهبلتي انتي لاا اكيد انهبلتي موافقه على وش يالتوف موافقه على وش
ابتعدت وهي ما تبي تقهر صالح اكثر : هذا نصيبي
انهبل صالح وركض وراها: اسمعيني يا مجنونه هذا مب نصيبتس هذا جحيمتس انتي تدرين وش يعني متزوج وابو عيال وعنده 3 حريم
الترف : ادري وابي اتزوجه
صالح: ابوي قالتس شي
الترف بضحكه مزيفه: لا وش يقول لي ابوي ولا انت غيران ما تبيني اعرس
صالح: مب وقت المزح يا الترف مب وقته
الترف : الا وقته ووقت الفرح بعد
دخلت نوره وراحت لها الترف وتركت صالح اللي انهبل : نوره نورره فهميها يا نوره
نوره ناظرت صالح بضيق :زين زين
طلع صالح وهو يلعن ثنيان واللي عرفه ثنيان
نوره : وش صار معتس
الترف بكت :خلاص ابوي زوجني وانتهى وقاله يجي بعد انا انتهيت يا نوره حتى صالح عجز في ابوي
نوره حضنتها : خلاص يالترف لا تبكين وربي وربي اني اضيق عليتس دام ابوتس ما نفع معه خذي سجادتس وصلي وادعي واستخيري وربي يكتب لتس الخيره
الترفف: يا رب يانوره
................••............
في المستشفى
عند ثنيان ومنيره اللي سلموا مي للطوارئ وجلسوا ومنيره ساكته بخوف وثنيان واقف وهو يطقطق اصابعه بتوتر طلعت الدكتوره وهي تأشر على ثنيان : زوجها!؟
ثنيان: اي
منيره: طمنينا يا دكتوره
الدكتوره : انا اسفه النزيف كان قوي وفقدنا الطفل
منيره: لا اله الا الله ومي كيفها
الدكتوره : حمدلله حالتها احسن وبعد شوي بناخذها غرفتها
راحت وثنيان وساكت بصدمه عظيمه منيره اللي جلست بضيق: الله يهديك ويصبر قلبها
ثنيان ابتعد وهو ساكت جلس وهو ماسك راسه بألم اخذ نفس وهو يرتب عقله اللي تبعثر تماماً
وبعد ساعه صحت مي وثنيان ومنيره واقفين برا
منيره: ثنيان ما بتدخل لها
ثنيان بتوتر : لا ادخلي انتي اول هديها وبعدين انا ادخل
منيره: بس محتاجتك الحين
ثنيان: لا يا منيره خليها تهدأ اول
منيره : طيب
دخلت منيره وهي تشوف مي تبكي بكى بحرقه منيره تقدمت وهي تحضنها : مي قولي لا اله الا الله لله ما اعطى ولله ما اخذ ان شاء الله ربي بيعوضك
مي : راح البيبي يا منيره وثنيان بيروح بعد
منيره: يا مي يا حبيبتي لا تفكرين في شي ابد فكري في نفسك وصحتك الحين والبيبي ربي بيعطيك ان شاء الله غيره عشره وبتربين وبتفرحين
مي : وينه ثنيان اكيد ما يبي يدخل اكيييد
منيره: لا ثنيان برا بس يبي تهدين ويدخل بعدين
مي تعدلت وهي تمسح دموعها : خليه يدخل ابغى اكلمه
منيره : ابشري انتي بس اهدي
مي وهي تتنهد : طيب طيب
طلعت منيره وشافت ثنيان متكتف ويدق برجله بالارض تقدمت : ثنيان مي تبي تكلمك
رفع راسه ثنيان بهدوء: كيفها !
منيره جلست : منهاره
ثنيان اخذ نفس ودخل الغرفه وهنا اجهشت مي بالبكى اسرع ثنيان خطوته وقرب وهو يحضنها ويحاول يهديها وانفجرت مي: لييه يا ثنيان لييييه بتتزوج توني ما صار لي سنه وتونا بأول طفل بعت كل شي وبتروح تتزوج ليييه يا ثنيان لهدرجه ما نهمك
ثنيان : اشششش يا مي مب وقته ابد اهدي انتي وارتاحي وبعدين نتكلم
مي ؛ متى بنتكلم اذا دخلتها علي ضرررره
ثنيان : مي هالموضوع منتهي انتي اتركي كل شي واهتمي بصحتك انتي الحين في وقت صعب لازم ما تتوترين
مي دفته بغضب ورجع ثنيان لورا وكان بيطيح: ثنيييييان وش ذا البرود تكلمني وكأن الموضوع عادي
غمض ثنيان وهو يحاول يهدي لا يكفخها : زواجي عادي وجداً عادي لكن يدك لو تنمد مره ثانيه اكسرها هذا واحد واثنين ما فيه اغلى واعز من منيره وتزوجت عليها ان بغيتي تجلسين بيتك مفتوح وان كان لك رأي اخر الله يستر عليك
مي اللي تفجرت بكى وطلع ثنيان وهو متعود على هالصياح بس الجديد انه ما كان يبي يفقد البيبي
منيره: ثنيان بتروح
ثنيان: وين اروح بوصلك وارجع .
منيره:وين توصلني بجلس عند مي اخاف تحتاج شي
ثنيان: امها جايه بالطريق مالي خلق مشاكلهم ولا ابيك تصدعين منهم
منيره مشت بهدوء وطلعت وثنيان اللي ركب وهو مختنق .................••............
في بيت ابو ثنيان
عند محمد اللي تعود على بيت عمه وجلسته فيه
نواف : محمد بطلع اجييب شي ناكله تبي شي
محمد : لا يعطيك العافيه
نواف : عمي طيب
محمد : لا ابوي اكله معين
نواف: زين اذا جوا ابوي وسيف من عند ابو خالد قولهم اني حاسبهم لا ياكلون شي
محمد : زييين
نواف : خاوني طيب غير جو
محمد : وين بتروح
نواف : مدري بنحدد فالطريق
محمد :والله مالي ابد خلق
نواف دق جواله ورد وكان واحد من اصحابه
نواف : محمد والله طلع لي شغل بس اسمع برسلك رقم مطعم دق واطلب منه وكثر واستلمه وانا بجي
محمد : هات
دق محمد وطلب وانتهى وجلس قدام ينتظر الطلب ................••............
عند رهام اللي كانت زهقانه بلحالها وهي تشوف دلال وبناتها رايحين لاعمامهم وثريا وعيالها نايمين في بيتهم وامها نايمه
راحت للمطبخ وهي تطل على المجلس الخارجي وشافته مسكره انوارها ومردود الباب : اييه زين الكل نايم متى يجي نواف زهقت
طلعت لغرفتها وهي تناظر السلسال بهدوء ومن جابه واذا محمد جابه ليش جابه وهل صدق محمد يحبها
رمت ذا الافكار من راسها ونزلت مسرعه للمطبخ لما سمعت اكياس ................••............
عند محمد اللي استلم الطلب ونادى ونادى محد رد فقرر يدخله نزله على الطاوله وهو يفتح الاكياس
دخلت رهام : نواف تكفى لا تقول ان جبت شاورما تعرفني ما احبها
محمد اللي كان وده يصيح بصوته كله ويقول ( لا تكفين لا تجين ماعاد ابي الصدف اللي توجعني على الفاضي ) تحرك بيطلع لكن ركضت رهام وهي تمسكه: تعال تعال اكيد انك اخذت البرقر وتركت لي الشاورما
محمد اللي خلاص كانت هاذي نهايته ترك البرقر وهو يبعد يدها بحنية الدنيا وهو مازال صاد : تكفين يا رهام اعرفيني تكفين لا عاد تغلطين فيني تكفين ارحميني معاد لقلبي حيله خليني اسلي نفسي على الاقل واقول ما اعرفها لاا تنبشين جروحي بالصدف انا محمد مانيب نواف
طلع وهو ما كان وده يقول كذا بس ان استمر الوضع كذا بينتهي وضعه بيموت من كثر حبه لها
رهام اللي هالمره صرخت بصوتها كله : ياااربي انا وش سويت يا ربي هذا وش يقوول يا ربي
تركت البرقر والشاورما وطلعت وهي تفكر بكلام محمد ................••............
ومحمد اللي دق على ثريا وهو يقولها تنتبه لابوه وطلع متجهه لبيت منيره وهو خلاص بيموت شافهم توهم ينزلون ووقف بعيد
ثنيان: محمد وش فيك
محمد : ولا شي ابي منيره
منيره: محمد حبيبي فيك شي
محمد : لا بس ابيك بموضوع
منيره : تعال معي
ثنيان: انا برجع
منيره ومحمد : الله يستر عليك
دخلت منيره ومحمد للمجلس وجلست بعد ماقالت لمشاعل ان محمد فيه
منيره: وش فيك وجهك منقلب لونه
محمد : منيره تكفين شوفي لي حل بموت بموت
منيره: بسم الله عليك وش فيك
اخذ محمد يدها وهو يحطها على صدره اللي بيتفجر من دق قلبه : تحسين يا منيره ولا لا
منيره: محمد تكفى لا تخوفني قول وش فيك
محمد : رهام يا منيره معاد اقدر اني احبها من بعيد معاد اقدر اني اشوفها من بعيد تكفين شوفي حل حاولي تسوين شي تكفين
منيره : محمد يا حبيبي وش اسوي انا وش بيدي
محمد : مدري روحي لدكتورها أساليه عن حالها يسمح تتزوج او اقنعيهم اتزوجها كذا بس بالاسم او اي شي
منيره: اهدأ انت وقولي وش اللي تغير وش صار
محمد وهو يمسح جبينه: الصدف تخنقني تخنقني وانا اشوفها قريبه مني لكنها ابعد من نجوم السماء
منيره سكتت شوي وهي تسمع كلام محمد : اسمعني طيب هي لها مراجعه لقلبها بعد شهر انتظر شهر وانا بروح معها واشوف وش يقول الدكتور او اسأله بعد
محمد : ايه تكفين سوي اللي تسوين بس شوفي حل
منيره: طيب يا محمد انت اهدأ بس وبعدين خلاص اخذ ابوي وارجع البيت او تعالوا عندي
محمد: لا لا برجع البيت واخذ عمي معنا وضعي معاد يسمح
منيره: اي احسن
محمد وقف : انا بروح تاخرت على ابوي
منيره: الله معك وانتبه لنفسك
محمد : زين
................••............
اما ثنيان اللي هالمره اتجهه لعجاج دخل الحاره بضيق وكان يرد السلام بدون نفس طلع لما وصل بيت عجاج ودق الباب وفتح عجاج : وش في.. ثنيان
ثنيان : من الحين اقولك اذا بتكمل زعل وتنسى كل شي قلي عشان اختصر شرح واطس لان اللي فيني مكفيني
عجاج ناظر وجهه بتمعن وكان الضيق واضح : ادخل ادخل
دخل ثنيان وهو جلس لي اول مكان واجهه عجاج اللي صب شاهي واعطاه: وش فيك
ثنيان بهدوء : الناس وافقوا رغم اني هونت وكنت اتمنى انهم يرفضون لكن وافقوا وعرفت مي وسقطت اللي ببطنها ويمكن بعد اهلها ياخذونها
عجاج: وشو سقطت
ثنيان : ايه
عجاج : تمزح اكيد
ثنيان: شايفني في وقت امزح فيه
عجاج: شفت شفت هذذا اللي انا اتكلم عنه هالمشاكل اللي ماله داعي من اساسه
ثنيان: عجاج ادري انك تكلمت بس الفاس طاح بالراس
عجاج : تستاهل عشان ثاني مره تفكر بعقلك
ثنيان : عندك كلام ينفعني !؟
عجاج سكت قام ثنيان وهو ينزل الشاهي : تدري من الحمار فالسالفه
عجاج: معروف انت
ثنيان: ايه صادق وتدري ليش
عجاج: ايه عشانك صاحبتني
ثنيان: جزاك الله خير
عجاج: اجمعين
طلع ثنيان بقهر وراح وعجاج اللي وقف يناظره لييين اختفى : اصبر يا ثنيان بعد ما جاك شي
................••............
في بيت ابو الترف
عند الترف اللي بعد محاولات فقدت الامل وبعد ما صلت اخذت عبايتها وطلعت وقابلتها نوره: وين رايحه كنت جايتس
الترف ؛ كنت بجيتس بعد
نوره: وش فيتس
الترف : بموت مخنوقه دوري اي وحده اتهاوش معها
نوره: وش اللي تهاوشين جرحتس يالله تشافى تروحين تهاوشين
الترف : نوووره بموت تدرين وش يعني يعني لو ما طلعت القهر اللي فيني بموت
نوره: اهدي طيب
الترف لفت : تدرين ماله داعي تدورين جت وجابها الله
سوير: طلعتي ايه حبيبتي انتي واخوتس تقتلون القتيل وتمشون بجنازته
الترف : الله الله الله من يحتسي دويده ما نشوفتس والله من الذبان
نوره: الترف امشي بس وش لتس فيها ذا المخنزه
سوير: حبيبتي ان كنتي ما تشوفين سلم الله يد منير اللي فقش بها راستس وريح المسلمين من شرتس يالعانس
الترف ما كانت تنتظر اشاره ابد : تخسين انتي ومنير وانا اعلمتس الحين وشلون تسلم ويدي وترتاحون يا اليهود
امسكتها الترف وتمسكت فيها سوير وكل وحده تكفخ الثانيه وبالقوه لين وخرتهم نوره
وركضت سلوى اللي شافتهم : يمه خييير خييير وش فيه دويده وش تبين هنا
دويده وهي تصلح برقعها اللي انقطع من الترف: عشان اربييتس انتي وياهم يابقرات الثلاث
سلوى شهقت: من البقره انااا
نوره: ماعليتس منها يا سلوى
سلوى اللي طلعت نعالها: لا يا حبيبتي وش اللي ما عليتس منها اذا ما خليتها تصايح مثل البقره ما اكون سلوى
الترف وهي تفصخ نعالها بعد : خذي حقتي اقوى كفخيها وتعالي انا راسي عورني
سلوى اللي طارت ورا سوير ودخلت معاهم بهوشه وطلعت بعد ما اخذت حقها
نوره: يوووك سلوى وش بلا عبايتس منشقه
سلوى: معليتس من الاضرار اهم شي لعنت خيرها
الترف : كفوو يا سلوى
سلوى: خشمتس
الترف: لا تكفين كرهت الخشوم من كثر ما قال ابوي تزوجين غصب خشمتس
ضحكوا ضحكه فيها شي كثير من الضيق لكن سلموا امرهم لله
................••............
مرت الايام بسرعه بسرعه ومر اسبوع والوضع انه ثنيان اللي كان اكثر واحد مكتئب وخصوصا ان الكل كان نوعاً ما معترضين على زواجه قدامه لكن من وراه معترضييين تماماً وكثرت ضغوطه ولا يدري من وين يحصلها مي واهلها اللي فجروا دماغه بالمشاكل وامه اللي زعلانه على زواجه وعجاج اللي ما يكلمه ابد اللهم ان ثنيان يجي يقوله مشكلته ويطلع وعجاج ما تكلم ولا كلمه وشايل هم زواجه اللي صار بنظره شي صعب
اما بالنسبه ل الترف هي الثانيه مكتئبه وعجزت وهي تحاول ان ابوها يسمع بس ما فيه امل
وحتى صالح كان يسوي كل شي يقدر يسويه بس ابد مافيه فايده
ومحمد اللي ما قدر انه يكمل عند عمه واخذ ابوه وطلع لبيته وهو كل يوم يتجدد ويزيد حبه لرهام
رهام كانت عكس محمد بدت تخاف منه وبدت تحس انها بتطيح في شباكه ولكن ما تبي تتعلق بوهم وهي تدري وش النهايه
وعجاج عجاج اللي كان يتقطع قلبه على ثنيان بس يبيه يعقل وهو يدري ان ما عند ثنيان عقل ابد
................••............
ويوم الجمعه الساعه 8في غرفة مشاعل فتح ثنيان عيونه على نور الشمس اللي يتسلل من بين الستاير لعيونه انقلب بضيق وهو يتنهد تحركت مشاعل : ثنيان فيك شي شفيك صاحي ذا الوقت
ثنيان : كم الساعه !
مشاعل :8
ثنيان جلس وراح يتروش ويلبس ووقف قبال المرايه وهو يناظر نفسه بهدوء كان يرتب نفسه حبه حبه وعلى اقل اقل من مهله وهو دقيقه يناظر نفسه وعشر دقايق سرحان
مشاعل: ثنيان وش فيك
ثنيان : ولا شي بعد ساعه اجهزي باخذك لاهلك
مشاعل: ليه اليوم الجمعه ما بنروح لبيت عمي
ثنيان : لا
مشاعل : وين بتروح طيب
ثنيان قال وهو يدقق النظر فيها من المرايه : رايح أملك
جمدت ملامح مشاعل للي حست فجاءه بغصه بس تداركت نفسها وهي تبتسم بهدوء: الله يبارك لك
ثنيان : ما تقصرين
طلع ثنيان وصادفته منيره اللي طالعه ومعاها ثياب محمد : صباح الخير
ابتسم ثنيان:صباح النور
منيره: خير وش بك مصحصح من بدري
ثنيان بهدوء : عندي شغله وبعدها بنروح لابو صالح
منيره كانت تعرف ان ابو زوجة ثنيان اسمه ابو صالح ابتسمت بضيق : الله يوفقك بس وش صار مع مي
ثنيان: ابد بترتاح عند اهلها واذا بترجع الله يحيها
منيره: الله يهدي سرها
نزل ثنيان وطلع وهو يمشي متجهه لبيت ابوه شاف نواف اللي يغسل سيارته وهو مستانس وعايش جوه ابتسم وهو يحب شخصية نواف اللي عكسه تماما ويتمنى انه يصير مثله بس ابو طبيع مايجوز عن طبعه
نواف وهو يدق بوري متكرر: حيييه معرسنا
ابتسم ثنيان: يقالكم متشققين فرح
نواف : والله يا اخوك انا لا موافق ولا معترض الله يوفقك في النهايه هي حياتك
ثنيان: ليتك توزع ذا الحكي عليهم
نواف : ادخل ابوي اصلا مروق وامي الله يعينك
ثنيان تقدم ودخل وشاف دلال وسيف وامه وابوه : سلام عليكم
سيف بإستهزاء: اووه وعليكم ماشاء الله معرسنا يلمع من بدري
ثنيان: لو تفتح عيونك كل يوم بتشوف اني دايم ألمع
دلال ببتسامه طيبه : اي والله يا ابو محمد دايم وانت ماشاء الله عليك الله يوفقك يارب ويسر لك
ام ثنيان اللي كانت صاده وقالت بغضب : هه ايه ماشاء الله عليه وبعدين هو وينه وين التيسير وهو بياخذ لي وحده ماهي من مواخيذنا
ثنيان اللي جلس بضيق : يمه اول شي بقوله لا تستحقرين احد يمه لا تشوفين نفسك على احد وبعدين وش يعني مب من مواخيذنا من زين مواخيذنا عاد ما اردى من المربوط الا المفتلت
وبعدين يمه هالكلام يرحم اهلك لا عاد اسمعه اذا جت الادميه هنا هالحكي ما ابيه
ابو ثنيان بتحفظ وزعل: متى بتملك !
ثنيان: بنتحرك بعد الجمعه يا ليت تجهزون من بدري
بندر بإستهزاء : وااااو حماس المعرس مؤثر صراحه
ثنيان لف يناظر له بإستحقار ورجع يناظر لسيف : عشان خاطرك يا سيف
بندر: يقالك مداري خاطر ابوي !
ثنيان غمض وهو مايبي يخرب يومه: عشان خاطرك يا ثنيان
بندر : ههههههههههههههههههههههه الله لا يبلانا الظاهر تفكيرك بالزواج والحريم خلاك مه..
قبل يتكلم سكته ثنيان بكف بقفى يده وقف لسيف اللي وقف وقال بغضب : سكت مره على شانك ومره على شاني لكن ولدك مب كفو حشيمه
نواف : ثنيان قول لا اله الا الله وبعدين خير انت يا بندر من يحاكيك اصلا وش قلة هالادب
الجد بغضب: عجيب والله عجيب
طلع بندر وهو كعادته يصارخ وجلس ثنيان بضيق : لا تناظرني كذا يا سيف لا تنتظر مني اسكت واحني رقبتي لبزر وانت جالس ما قلت ولا كلمه
سيف سكت وطلع ام ثنيان: ايه هذا بداية تفرقت عيالي
ثنيان: مب انا اللي افرق يمه مب انا
جمع اغراضه : يبه بعد الصلاة بمركم خلكم جاهزين
طلع وهو يلعن في نفسه تحرك بيروح لعجاج بس وقف وهو يقول بتمتمه: ارووح ليش اروح عشان انغث وارجع
وقف ونزل من السياره وهو يمشي للمسجد جلس ينتظر الخطبه وهو يقراء قرانه